काठमाडौँ — काठमाडौं महानगरपालिकामा कांग्रेसका वडाध्यक्षहरूले प्रमुख प्रशासकीय अधिकृतको विषयमा जानकारी गराउन मेयर बालेन्द्र शाहसमक्ष तत्काल कार्यपालिका बैठक राख्न माग गरेका छन् ।
महानगरमा गत पुसदेखि कार्यपालिका बैठक बस्न सकिरहेको छैन । सोही अवस्थामा महानगरका कांग्रेसका कार्यपालिका सदस्यहरूले आइतबार मेयर शाहसमक्ष तत्काल कार्यपालिकाको बैठक बोलाउन माग गरेका हुन् ।
महानगरका प्रवक्ता नविन मानन्धरले प्रमुख प्रशासकीय अधिृकत सरोज गुरागाईंमाथि गरिएको कारबाही प्रक्रियाबारे जानकारी लिन कार्यपालिका बैठक माग गरिएको जानकारी दिए ।
‘प्रमुख प्रशासकीय अधिकृतको लागि के पहल गर्ने भयो ? र यसलाई व्यक्ति र स्थानबाट मात्र त्यसलाई ल्याउने होइन कि संस्थागत रूपबाट,’ उनले भने, ‘र महानगरपालिकाको मुख्य कमिटी भनेको कार्यसमिति नै हुन्छ । बोर्ड नै हुन्छ । त्यो बोर्डबाट नै निर्णय गरेर सत्यतथ्य सहितको महानगरपालिकाको कार्यकारिणीविहीन अवस्था नराख्नको लागि हामीले माग गरेका हौं ।’
यसमा महानगर प्रमुख शाहले २/३ दिनभित्र सबै विषय मिलाएर बैठक डाक्ने प्रतिक्रिया दिएको उनले बताए ।
‘मात्र हामीले कार्यकारिणी माग गरेका छौं । कार्यकारिणी नभएको अवस्थाले गर्दा आर्थिक चलायमान हुन सकिरहेको छैन,’ उनले भने, ‘यसले गर्दा कार्यरत कर्मचारीले तलब पाईरहेको छैन भने विकास निर्माणका कामहरू पनि अगाडी बढाउन सकिरहेको छैन ।’
