काठमाडौँ — भारतीय राज्य ओडिसाको राजधानी भुवनेश्वरस्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयको होस्टेलमा मृत भेटिएकी प्रकृति लम्साललाई न्याय दिलाउन माग गर्दै काठमाडौंमा मंगलबार प्रदर्शन गरिएको छ ।  

युवा, विद्यार्थीहरुले काठमाडौंका विभिन्न ठाउँमा प्रदर्शन गरेका हुन् । प्रदर्शनमा सहभागीले 'नेपाली विद्यार्थीमाथि भएको दमन बन्द गर,' 'महिला हिंसा अन्त्य गर', 'नेपाली विद्यार्थीको सुरक्षाको ग्यारेन्टी गर,' 'प्रकृति लम्साललाई न्याय दे' लगायत नारा लेखेका प्लेकार्ड प्रदर्शन गरेका थिए । 

बी–टेक तेस्रो वर्षमा पढ्ने लम्साल आइतबार साँझ होस्टेलमा मृत भेटिएकी थिइन् । नेपाली विद्यार्थीहरूका अनुसार लम्सालमाथि भारतीय विद्यार्थी आद्धिक श्रीवास्तवले बारम्बार दुर्व्यवहार गर्ने गरेका थिए । असह्य भएपछि लम्सालले आत्महत्या गरेको उनीहरूको भनाइ छ । 

यसअघि लम्सालले समेत आफूमाथि दुर्व्यवहार भएको भन्दै श्रीवास्तवविरुद्ध विश्वविद्यालय प्रशासनमा उजुरी दिएकी थिइन् । तर, विश्वविद्यालय प्रशासनले उजुरीको सुनुवाइ नगरेको नेपाली विद्यार्थीको भनाइ छ ।