भैरहवा — बुद्ध जन्मस्थल लुम्बिनीस्थित पाँचतारे होटल लुम्बिनी हेरिटेजले आन्तरिक पर्यटक लक्षित सस्तो प्याकेज सार्वजनिक गरेको छ । जेठ दोस्रो साता लगातार परेको चारदिने सार्वजनिक बिदा लक्षित गरेर होटलले मंगलबार उक्त प्याकेजबारे जानकारी दिएको हो । 

होटलका महाप्रबन्धक बिजेन्द्रभक्त भाजुले बिहीबारबाट लागू हुने गरी १५ हजार रुपैयाँमा तीन रात, चार दिनको प्याकेज सार्वजनिक गरिएको जनाए । उक्त प्याकेज खरिद गरेपछि कोठा, खाजा–खाना, सबै इभेन्ट र स्विमिङ पुलमा प्रवेश मिल्ने छ । उनका अनुसार बिहीबार मुस्लिम समुदायको चाड ईद परेकाले उक्त चाड लक्षित गरेर प्याकेज ल्याइएको हो । 

ईदका दिन पाहुनाका लागि खानपिनमा छुटका साथै मकाउमा नेपाली बक्सर रवीन्द्र ढाँट सहभागी हुने यूएफसी खेलको प्रत्यक्ष प्रसारण गरिनेछ । उक्त खेलमा ढाँटले फिलिपिन्सका खेलाडीसित प्रतिस्पर्धा गर्दैछन् । शुक्रबार साँझ ६ देखि मध्यरात १२ बजेसम्म विशेष कार्यक्रम सञ्चालन हुनेछ । यसक्रममा खानाका विभिन्न परिकारमा छुट प्रदान गरिएको छ । पौडी पोखरीमा निःशुल्क प्रवेश दिइनेछ ।_{लुम्बिनी हेरिटेजका महाप्रबन्धक बिजेन्द्रभक्त भाजु पाहुनालाई स्वागत गर्दै ।}