भैरहवा — रूपन्देहीको भैरहवामा मुख्य कार्यालय रहेको नेपाः ट्राभल्स एण्ड टुर्स प्रालिले आन्तरिक तथा बाह्य पर्यटक लक्षित गरेर मुलुकका पर्यटकीय गन्तव्य भ्रमण प्याकेज सार्वजनिक गरेको छ । मुलुकका ७७ वटै जिल्लामा अनलाइन शाखा विस्तारका क्रममा मुलुकका प्रमुख पर्यटकीय गन्तव्य भ्रमण गर्ने स्वदेशी तथा विदेशीका लागि प्याकेज घोषणा गरेको हो । 

नेपाः ट्राभल्सका सञ्चालक सन्जय बजिमयले लुम्बिनी, पोखरा, मुक्तिनाथ, चितवन, काठमाडौं र बर्दिया लगायत गन्तव्यका लागि भ्रमण प्याकेज सार्वजनिक गरिएको जानकारी दिए । अधिकांश गन्तव्यका लागि दुई रात तीन दिनका लागि प्याकेज सार्वजनिक गरिएको हो । रूपन्देहीको बेलहिया नाका र गौतमबुद्ध अन्तर्राष्ट्रिय विमानस्थल हुँदै आउने पर्यटकलाई भैरहवाबाट पर्यटकीय गन्तव्यमा सहज ढंगले घुमाउन प्याकेज तयार गरिएको हो । 

रूपन्देही पर्यटकीय केन्द्र भए पनि यहाँबाट अन्य गन्तव्यका लागि भ्रमण प्याकेज घोषणा गरिएको थियो । सञ्चालक बजिमयका अनुसार भैरहवाबाट लुम्बिनीमा दुई रात तीन दिन घुमफिर गरेको १५ हजार ९ सय ९९ भारतीय रुपैयाँ तोकिएको छ । त्यति नै खर्चमा पोखरा घुम्न सकिनेछ । यहाँबाट मुक्तिनाथसम्म तीन रात चार दिनको भ्रमण प्याकेज रहेको छ । त्यसको ८ हजार ४ सय ९९ भारतीय रुपैयाँ तोकिएको छ । 

चितवनमा दुई रात तीन दिनको १५ हजार ९ सय ९९ भारतीय रुपैयाँको भ्रमण प्याकेज रहेको छ । यसमा काठमाडौंबाट चितवनसम्मको हवाई भाडा समेटिएको छ । यहाँबाट काठमाडौंको दुई रात तीन दिनको प्याकेजको ९ हजार ९ सय ९९ भारतीय रुपैयाँ तय गरिएको छ । ‘भैरहवाबाट मुलुकका अन्य गन्तव्यमा भ्रमण गर्ने धेरै भारतीय नागरिक हुन्छन्,’ उनले भने, ‘त्यसैले प्याकेज मूल्य पनि भारतीय रुपैयाँमा राखिएको हो ।’