इटहरी — इटहरीस्थित पश्चिम टेम्पोलाइन सधैं भिडभाड हुने ठाउँ हो । शुक्रबार त्यहाँ अझ बढी भिड लाग्यो ।

एक्स्ट्रिम इनर्जी ड्रिङ्क्सले प्रायोजन गरेको रेडियो कान्तिपुरको रोड शो रेडियो अन ह्वील्स इटहरी पुग्दा भिड बाक्लिएको थियो । मुख्य प्रायोजकसँगै अन्य प्रायोजकका स्टलअगाडि खेल खेलेर आकर्षक पुरस्कार जित्न केटाकेटीदेखि युवा र प्रौढ सबै उमेर समूहको भिड थियो । कोही इनर्जी ड्रिङ्क्स पिएर लक्की ड्रमा आफ्नो नाम लेखाउन व्यस्त थिए । त, कोही वाईफाई नेपालको स्टल अगाडि बल्छीमा उपहार पार्न । 

जब मिनी ट्रकमा उभिएर आरजे महेश लिम्बू र स्मिता राणाले कार्यक्रम सञ्चालन गर्दै 'नमस्ते इटहरी' भन्न थाले त्यसपछि भिडमा अर्कै माहोल छायो । गीत, संगीत, नृत्य, व्यंग्य सबको सम्मिश्रण बन्यो रेडियो अन ह्वील्स ।

रेडियो अन ह्वील्समा सहभागीहरूले यसपटक आगामी फेब्रुअरी–मार्चमा आयोजना हुने टी–२० विश्वकपको टिकटसहित ४ रात ५ दिनको विशेष प्याकेज र दुईतर्फी यातायात सुविधा जित्ने अवसर पाउनेछन् ।

कार्यक्रम आयोजना हुने १५ वटै स्थानमा एक्स्ट्रिम वा म्याक्स टाइगर इनर्जी ड्रिङ्क्स खरिद गर्ने सहभागीको नाम र नम्बर लक्की ड्रमा समावेश गरिने आयोजकले जनाएको छ। प्रत्येक स्थानबाट एकएक भाग्यशाली विजेताले विश्वकप प्याकेज जित्नेछन् । 

इटहरीमा त्यो प्याकेज मैयाँ कार्कीले जितिन् । शनिबार धरानको भानुचोकमा कार्यक्रम आयोजना हुने रेडियो कान्तिपुरले जनाएको छ । आइतबार विराटनगर र सोमबार सिरहाको लहानका कार्यक्रम सकेर रोड शो काठमाडौं लाग्नेछ । काठमाडौं उपत्यकामा रोड शो को अन्तिम कार्यक्रम आयोजना गरिने रेडियो कान्तिपुरका स्टेशन म्यानेजर पवन आचार्यले जानकारी दिए ।