काठमाडौँ — कान्तिपुर मिडिया ग्रुपले इङ्लिस प्रिमियर लिग (ईपीएल) सँग सहकार्य घोषणा गरेको छ ।

यस सहकार्यको केन्द्रमा युनिलिभर नेपालको प्रमुख हेयर केयर ब्रान्ड क्लियर रहने सम्झौतासमेत गरिएको छ । ईपीएलसँगको यो साझेदारीमार्फत अब नेपाली दर्शकले पनि क्लियरको शक्तिलाई कान्तिपुर मिडिया ग्रुपका टेलिभिजन तथा डिजिटल प्लेटफर्महरूमा प्रत्यक्ष महसुस गर्न सक्ने जनाइएको छ ।  

यो साझेदारी युनिलिभरको विश्वव्यापी फुटबलप्रतिको प्रतिबद्धता र उपभोक्तासँग विश्वस्तरीय अनुभवमार्फत अर्थपूर्ण सम्बन्ध निर्माण गर्ने लक्ष्यको प्रतिविम्ब रहेको कम्पनीले बताएको छ ।

‘युनिलिभरले विश्वभर फुटबलसँग लामो समयदेखि सहकार्य गर्दै आएको छ,’ कम्पनीले जारी गरेको विज्ञप्तिमा भनिएको छ, ‘यसको पर्सनल केयर डिभिजन सन् २०२७ सम्मका लागि फिफाको आधिकारिक ग्लोबल पार्टनर रहनेछ, जसमा सन् २०२६ को फिफा वर्ल्ड कपसमेत समावेश छ । यसले यूईएफए युरोपियन च्याम्पियनसिप २०२४ र आउँदो यूईएफए युरोपियन वुमेन्स च्याम्पियनसिप २०२५ जस्ता ठूला प्रतियोगितामा पनि सक्रिय भूमिका खेलेको छ ।’

यस्ता सहकार्यले खेलकुदको शक्ति समुदायलाई एकताबद्ध गर्न र आत्मविश्वास जगाउन महत्त्वपूर्ण भूमिका खेल्ने अनि युनिलिभरको विश्वासलाई प्रतिविम्बित गर्ने विज्ञप्तिमा जनाइएको छ ।