नेपाल र श्रीलंकाका चेम्बर अफ कमर्सका महासचिवहरूले व्यावसायिक अवसर बढाउन सम्झौतामा हस्ताक्षर गरेका छन्।
What you should know
काठमाडौँ — नेपाल–श्रीलंका चेम्बर अफ कमर्स एन्ड इन्डस्ट्री र चेम्बर अफ एक्सपोर्ट श्रीलंकाबीच व्यापार, लगानी, संयुक्त उद्यमलगायतका विषयमा समझदारी पत्रमा हस्ताक्षर भएको छ ।
नेपालका लागि श्रीलंकाका एक्टिङ एम्बेसडर चार्ज दि अफेयर्स (एआई) चमेरा मुनासिंघेको उपस्थितिमा भएको जुम मिटिङमार्फत नेपाल श्रीलंका चेम्बर अफ कमर्स एन्ड इन्डस्ट्री (एनएससिसिआई) का महासचिव नरेन्द्र बल्लभ पन्त र श्रीलंकाका राष्ट्रिय निर्यातकर्ता चेम्बर अफ कमर्सका महासचिव/प्रमुख कार्यकारी अधिकृत एम. शिहम मारिकरबीच हस्ताक्षर भएको हो ।
यो सम्झौता ऐतिहासिक भएको भन्दै मुनासिंघेले आगामी दिनमा दुई मुलुकबीच व्यावसायिक गतिविधि बढ्ने धारणा राखिन् ।
आउँदो सेप्टेम्बर १८ देखि २१ सम्म श्रीलंकामा इन्डस्ट्रियल एक्स्पो हुने भएको छ । उक्त एक्स्पोमा नेपालका प्रतिनिधिमण्डल सहभागी हुने भएका छन् । आगामी दिनमा नेपालमा पनि सोही प्रकृतिको एक्स्पो आयोजना गरिनेछ र श्रीलंकाका प्रतिनिधि सहभागी हुनेछन् ।
सम्झौता पत्रमा हस्ताक्षरपछि दुवै संस्थाका सदस्यहरूले एक अर्काको मुलुकमा व्यक्तिगत तथा सामूहिक भ्रमण गर्न सक्नेछन् । त्यसरी गरिने भ्रमणले स्थानीय र राष्ट्रिय आर्थिक गतिविधि बढाउनुका साथै दुई देशसँग सम्बन्धित बजार, आर्थिक विकास पहलहरू, विदेशी व्यापार तथा लगानी नीतिहरूमा नियमित छलफल हुन सक्ने उल्लेख छ ।
साथै व्यापार, लगानी, सेवा, व्यापारिक सम्बन्ध, भ्रमण र व्यावसायिक समूहहरूको आदानप्रदानका साथै व्यापार प्रवर्द्धनका सम्भावित गन्तव्यहरूका बारेमा थप छलफल गरिने सम्झौतामा उल्लेख छ ।
आ–आफ्नो देशमा आयोजना हुने अन्तर्राष्ट्रिय मेला, प्रदर्शनी तथा व्यापार प्रवर्द्धन कार्यक्रमहरूको आयोजनासमेत गरिने उल्लेख छ ।
सम्झौता पत्रमा उल्लिखित उद्देश्यलाई अगाडि बढाउन दुवै पक्षले नेपाल र श्रीलंकामा एक अर्काको कार्यालय र सचिवालय सुविधाहरूको उपयोग गर्ने सहमति जनाएका छन् ।
सम्झौतामा दुवै पक्षले दुवै देशका व्यवसायीहरूबीच उत्पन्न हुन सक्ने व्यापार विवाद समाधान गर्न एक अर्कालाई मद्दत गर्ने उल्लेख गरिएको छ ।
