महिला सिर्जनशील केन्द्रको आयोजनामा बालुवाटारस्थित आम्रपाली ब्याङ्क्वेटमा महिला उद्यमी मेला सुरु भएको छ। मेला साउन २५ गतेसम्म चल्नेछ।
काठमाडौँ — तीजलाई लक्षित गर्दै आजबाट २२औं डाबर तीज फेस्टिभल तथा सिर्जनशील उद्यमी मेला सुरु भएको छ । उद्योगमन्त्री दामोदर भण्डारीले मेलाको उद्घाटन गरेका हुन् ।
उद्घाटन गर्दै उनले यस मेलाले उद्यमी महिला तथा युवाहरूलाई व्यवसायमा प्रोत्साहन पुग्ने बताएका छन् । उनले आफूले उत्पादन गरेका सामग्रीहरूलाई ग्राहकसम्म पुर्याउन यस मेलाले सहयोग पुग्ने समेत बताएका छन् ।
महिलाहरूलाई सीपमा दक्ष बनाउँदै उद्यमशीलता र स्वरोजगारतर्फ प्रेरित गर्नु र प्रविधिमैत्री वातावरण सिर्जना गरेर महिलालाई आर्थिक रूपमा सशक्त बनाउने उद्देश्यका साथ मेला आयोजना गरिएको महिला सिर्जनशील केन्द्रकी अध्यक्ष मिलु थापाले बताइन् । उनले मेलामा युवाहरू पनि आकर्षित भएको बताइन् । उनले भनिन्, ‘पहिलाको मेलाभन्दा यो मेलामा युवाहरूको उपस्थिति राम्रो छ, यसले युवाहरू पनि उद्यमशीलतामा अग्रसर छन् भन्ने देखाएको छ ।’
बालुवाटारस्थित आम्रपाली ब्याङ्क्वेटमा सञ्चालन गरिएको मेलामा लत्ताकपडा, कस्मेटिक, चुरा–पोते, गरगहना, विभिन्न परिकारलगायतका सामग्रीहरू राखिएका छन् ।
सिर्जनशील केन्द्रको प्रवर्द्धन, राइजिङ नेपाल प्रालिसँगको सहकार्य तथा इभेन्ट सञ्चार डटकमको व्यवस्थापनमा मेला सञ्चालन गरिएको हो । मेलामा १ सयवटा स्टल रहेको बताइएको छ । हरेक वर्ष हुने गरेको यो मेला साउन २५ गतेसम्म सञ्चालन हुनेछ ।
