काठमाडौँ — सार्क विकास कोष (एसडीएफ) ले सेभ द चिल्ड्रेनसँगको सहकार्यमा 'गुणस्तरीय समावेशी प्रारम्भिक बाल विकास तथा आधारभूत शिक्षाको लागि साझेदारी' नामक क्षेत्रीय परियोजना सुरु गरेको छ । सार्क विकास कोष र सेभ द चिल्ड्रेनको संयुक्त लगानी रहेको तीन वर्षे परियोजनाको कूल लागत ४.७९ मिलियन अमेरिकी डलर रहेको छ ।

परियोजनाले नेपाल र भुटानका सरकार, स्थानीय समुदाय, शिक्षक, प्रारम्भिक बाल विकास तथा आधारभूत शिक्षा सहजकर्ता, र ३ देखि १२ वर्ष उमेर समूहका बालबालिकासँग सहकार्य गर्दै गुणस्तरीय, समावेशी प्रारम्भिक बाल विकास र आधारभूत शिक्षाको प्रवर्द्धन गर्नेछ ।

सार्कका महासचिव महामहिम मोहम्मद गोलाम सर्वारले परियोजनाले भुटान र नेपालको राष्ट्रिय प्राथमिकताहरू कार्यान्वयन गर्न सहयोग  गर्नुका साथै शिक्षामा समान पहुँचको प्रवर्द्धन र मानव विकासमार्फत सार्कको गरिबी निवारण कार्य योजनामा पनि योगदान पुर्‍याउने बताए । परियोजनाले समुदायस्तरमा साझा चुनौती सामना गरिरहेका र उस्तै मनोभावना बोकेका अन्य सार्क सदस्य राष्ट्रहरूमा पनि यस्तै किसिमका पहलहरू सुरु गर्न प्ररित गर्ने उनको भनाइ छ ।

नेपालमा परियोजना मधेश प्रदेशमा कार्यान्वयन गरिनेछ, जहाँ प्रारम्भिक बाल विकासका सूचकहरू अत्यन्त कमजोर छन्। हालै गरिएको एक अध्ययनले पूर्वाधार, सिकाइ सामग्री, हेरचाहकर्तामा चेतना, र अपांगता समावेशीतामा गहिरो खाडल रहेको देखाएको छ- विशेष गरी महोत्तरी र सर्लाही जिल्लामा, जहाँ ५३ प्रतिशत भन्दा बढी जनसंख्या निरक्षर छन् ।