काठमाडौँ — नबिल बैंकले बालबालिकोको कार्यसम्पादनमा उनीहरूको खातामा पैसा जम्मा गरिदिन मिल्ने डिजिटल एपमा आधारित बचत खाता सार्वजनिक गरेको छ । राष्ट्रिय बाल दिवसको अवसर पारेर बैंकले बुधबार ‘नबिल जेन अल्फा’ नामक उक्त एप सार्वजनिक गरेको हो ।

उक्त योजनामा १८ बर्षभन्दा मुनिका बालबालिकाहरू मात्र सहभागी हुन पाउँछन् । बालबालिकाले यो एपमा दिइएको कार्यहरू सम्पादन गरेको आधारमा अंक प्राप्त गर्नेछन् र उक्त अंक सम्बन्धित खातामा पैसाको रूपमा बचत हुनेछ । यो योजनाका लागि बैंकमा अभिभावक र बालबालिका दुबैको खाता हुनुपर्नेछ । अभिभावकले दिएको कार्य बालिबालिकाले पूरा गरेपछि अभिभावकको खाताबाट बालबालिकाको खातामा रकम स्थानान्तरण गरिन्छ । उक्त योजनामा बैंकले वार्षिक ६.३ प्रतिशत ब्याजदर दिन्छ । यदि खातामा ३० हजार रुपैयाँभन्दा धेरै जम्मा भएको अवस्थामा खातामा १० हजार राखेर बाँकी २० हजार रुपैयाँ मुद्दती निक्षेपमा परिणत हुने र त्यसमा ९.०३ प्रतिशत ब्याज प्रदान गर्ने बैंकले जनाएको छ ।