जिल्ला प्रहरी कार्यालय महोत्तरीका अनुसार जेठ २२ गते साँझ घरबाहिर खेल्ने क्रममा बेपत्ता भएका मनिकेशको शव जेठ २४ गते साँझ स्थानीय पोखरीमा सिमेन्टको बोराभित्र फेला परेको थियो ।
महोत्तरी — महोत्तरीको सम्सी गाउँपालिका–५ पोखरभिण्डाका ३ वर्षीय मनिकेश कुमार यादवको मृत्यु साइकलको ठक्करबाट भएको र घटना लुकाउन शव पोखरीमा फालिएको रहस्य खुलेको छ ।
जिल्ला प्रहरी कार्यालय महोत्तरीका अनुसार जेठ २२ गते साँझ घरबाहिर खेल्ने क्रममा बेपत्ता भएका मनिकेशको शव जेठ २४ गते साँझ स्थानीय पोखरीमा सिमेन्टको बोराभित्र फेला परेको थियो । घटनास्थलबाट बालकका दुवै हातमा रहेका चाँदीका बाला पनि हराएका थिए ।
घटनाको अनुसन्धानका क्रममा प्रहरीले करिब १५ वर्षीया एक नाबालिकालाई साउन ५ गते नियन्त्रणमा लिएर अनुसन्धान थालेको जिल्ला प्रहरी कार्यालय महोत्तरीका प्रहरी नायब उपरीक्षक पञ्चलाल गोलेले बताए ।
प्रारम्भिक अनुसन्धानको क्रममा नाबालिकाले मल बोकेको साइकल खेततर्फ लैजाँदै गर्दा ब्रेक नलागेका कारण विपरीत दिशाबाट दौडँदै आएका बालक साइकल अगाडि परेको र ठक्करपछि साइकलका दुवै चक्का बालकको छातीमाथि चढ्दा उनको मृत्यु भएको प्रहरी नायव उपरीक्षक गोलले बताए ।
प्रहरीका अनुसार घटना बाहिरिने डरले नाबालिकाले बालकको शव सिमेन्टको बोरामा राखेर करिब ३ सय मिटर टाढाको पोखरीमा फालेकी थिइन् । बालकका हातमा रहेका दुई थान चाँदीका बाला पनि निकालेर लुकाएको प्रहरीको भनाइ छ ।
अनुसन्धानका क्रममा प्रहरीले हराएका दुई थान चाँदीका बाला तथा घटनामा प्रयोग भएको साइकल बरामद गरेको छ । जिल्ला प्रहरी कार्यालय महोत्तरीका प्रहरी नायब गोलेका अनुसार नाबालिकाविरुद्ध कर्तव्य ज्यान मुद्दामा महोत्तरी जिल्ला अदालतबाट पाँच दिनको म्याद थप गरी थप अनुसन्धान भइरहेको छ ।
