पर्सा — वीरगन्ज महानगरपालिका क्षेत्रको मुख्य सडक विस्तार बुधबारदेखि पुनः सुरु हुने भएको छ ।

सडक डिभिजन कार्यालय हेटौंडाका इन्जिनियर तथा वीरगन्जका लागि तोकिएका फोकल पर्सन दुर्गा प्रसादले बुधबारदेखि काम सुरु गर्ने गरी मंगलबार टोली वीरगन्ज पुगिसकेको बताए ।

बुधबार बिहान सरोकारवालाहरूसँग छलफल गरी मध्यान्ह करिब १२ बजेबाट विस्तार अभियान सुरु गर्ने योजना रहेको उनले बताए । अभियानमा साविककै जत्तिको संख्यामा (आधा दर्जन) डोजर प्रयोग गरिने छ । यसअघि कार्यालयको टोलीले गत बुधबारसम्म सडक विस्तारसम्बन्धी काम गरेको थियो ।

वीरगन्जमा गत बिहीबार गहवामाईको रथयात्रा परेको, अत्यधिक गर्मीलगायतका कारण काम स्थगित गरिएको थियो ।

सडक विभागले पहिलो चरणमा गत ६ र ७ वैशाख मुख्य सडक क्षेत्रका करिब १२ सय घर तथा भवनमा डोजर चलाएको थियो । त्यसक्रममा अधिकांश संरचनाको अगाडिको भाग भत्काइएको थियो । सडक सीमाभित्र परेका संरचना २५ दिनभित्र स्वयं हटाउन सम्बन्धितलाई आग्रह गरिएको भए पनि समयसीमा सकिँदासमेत धेरै संरचना यथावत् रहेपछि विभागले २ साताअघि दोस्रो चरणको अभियान सुरु गरेको हो ।