बाढी र डुबानका कारण जोखिममा परेका नागरिकको सुरक्षित उद्धार, उद्धार कार्यमा आवश्यक समन्वय तथा विपद् प्रतिकार्य क्षमताको व्यावहारिक अभ्यास कार्यक्रमको मुख्य उद्देश्य रहेको थियो। अभ्यासका क्रममा दुवै देशका विपद् व्यवस्थापन तालिमप्राप्त सुरक्षाकर्मीले बाढीमा फसेका व्यक्तिको उद्धार, सुरक्षित स्थानमा स्थानान्तरण तथा समन्वयात्मक कार्यसम्पादनको प्रदर्शन गरेका थिए।

कार्यक्रममा स्थानीय जनप्रतिनिधि, भद्रभलादमी, सीमावर्ती क्षेत्रका स्थानीयवासी तथा विभिन्न सरोकारवाला निकायका प्रतिनिधिको उल्लेखनीय सहभागिता रहेको थियो। सशस्त्र प्रहरी बल, नेपालले सीमावर्ती क्षेत्रमा विपद् प्रतिकार्य क्षमता अभिवृद्धि, नेपाल–भारत सुरक्षा निकायबीच समन्वय सुदृढीकरण तथा जनधनको क्षति न्यूनीकरणका लागि यस्ता संयुक्त अभ्यास हरेक वर्ष सञ्चालन गर्दै आएको जनाएको छ।

आगामी दिनमा पनि भारतीय समकक्षी एसएसबीसँगको सहकार्यलाई थप प्रभावकारी बनाउँदै निरन्तरता दिइने सशस्त्र प्रहरी बल पर्साका सूचना अधिकारी प्रहरी नायब उपरीक्षक मोहनराज निरौलाले जानकारी दिए ।