वीरगन्ज महानगरपालिकाको मुख्य सडक क्षेत्रमा एक सातामा ३ सयभन्दा बढी घर डोजर प्रयोग गरी भत्काइएको छ, अझै २ किलोमिटर क्षेत्रमा काम जारी छ।
What you should know
पर्सा — – वीरगन्ज महानगरपालिकाको मुख्य सडक क्षेत्रमा सडक बिस्तारको काम थालिएको एक सातामा करिब ३ सय घर भत्काइएको छ ।
सडक डिभिजन हेटौंडाका इन्जिनियर तथा वीरगन्जका लागि तोकिएका फोकल पर्सन दुर्गा प्रसादले गण्डकदेखि घण्टाघरसम्म र मितेरी पुलदेखि वीरगन्ज उद्योग वाणिज्य संघको भवनसम्म गरेर यति परिमाणमा भवन भत्काइएको जानकारी दिए ।
उनले हाल परिचालित ६ वटा डोजरले दैनिक ५० देखि ६० वटासम्म घर भत्काइरहको जानकारी दिए । कूल ८ किलोमिटर सडक क्षेत्रमा घर भत्काउनु पर्नेमा करिब ६ किलोमिटर क्षेत्रको घर भत्काएर हटाइसकिएको उनले बताए ।
अब बाँकी रहेको २ किलोमिटर सडक क्षेत्रमा सडक भत्काउने काम पनि क्रमशः जारी रहने उनले बताए । भत्काउन बाँकी रहेको बजार क्षेत्रका केही घरधनीले आफ्नो भवनको संरचना आफै हटाइरहेकाले यस क्षेत्रमा काम गर्न त्यति कठिनाई नहुने उनले बताए ।
गत शुक्रबारदेखि बुधबारसम्म गण्डकदेखि घण्टाघरसम्म र बिहीबारदेखि शुक्रबारसम्म मितेरी पुलबाट उत्तरतिर डोजर चलाउन थालिएको हो । गत वैशाख ६ र ७ मा सडक विभागले पहिलो चरणमा मुख्य सडक क्षेत्रका करिब १२ सय घर तथा भवनमा डोजर चलाएको थियो ।
त्यसक्रममा अधिकांश संरचनाको अगाडिको भाग भत्काइएको थियो भने सडक सीमा क्षेत्रमा परेका संरचना २५ दिनभित्र आफै हटाउन सम्बन्धितलाई आग्रह गरिएको थियो । तर समयसीमा सकिँदासमेत धेरै संरचना यथावत् रहेपछि विभागले गत शुक्रबारदेखि दोस्रो चरणको अभियान अघि बढाएको हो ।
