सिरहा — सिरहामा कुटपिट घटनाका पीडितले आफूले दिएको उजुरीमाथि सुनुवाइ नभएको विषयमा गुनासो गर्दा प्रहरीबाटै दुर्व्यवहार भोग्नु परेको गुनासो गरेका छन् । 

गोलबजारस्थित इलाका प्रहरी कार्यालय परिसरमा प्रहरीले पीडितलाई दुर्व्यवहार गरेको हो । गोलबजार नगरपालिका-११ मा दुई महिनाअघि बाख्राको विषयमा स्थानीय समसाद लहेरी र रुबो खातुनबीच झगडा भएको थियो । त्यसक्रममा रुबोका छोरा कैस खातुनको कुटपिटबाट समसाद पनि घाइते भए भने उनकी श्रीमती जरिना खातुनको औंला भाँचिएको थियो ।

जरिनाको स्थानीय अस्पतालमा उपचारपछि विराटनगरस्थित न्यूरो अस्पतालमा शल्यक्रिया गरी स्टिल राखिएको थियो । सोही विषयमा समसादले प्रहरीमा उजुरी दिएका थिए । उनीहरूबीच यसअघि पनि छलफल भएकोमा उपचार खर्चको विषयलाई लिएर विवाद मिल्न सकेन ।

पछिल्लो समय रुबो पक्ष प्रहरीमा छलफलमा आउनै छाडेका थिए । आजका लागि पनि दुवै पक्षलाई प्रहरीमा छलफलमा डाकिएको थियो । पीडित पक्ष प्रहरीमा पुगे पनि पीडक पक्ष नआएपछि प्रहरीसमक्ष उनीहरूले गम्भीरतापूर्वक किन नलिएको भन्दै गुनासो गरेका थिए । सोही क्रममा प्रहरी र पीडित पक्षबीच भनाभन भएको थियो । प्रहरीले त्यसक्रममा पीडितलाई धकेल्दै र अपशब्द प्रयोग गरी कार्यालयबाट निकालेको फोटो, भिडियो सामाजिक सञ्जालमा सार्वजनिक भएको छ । 

आफूहरू बोलाइएको दिन पटकपटक प्रहरीमा पुगे पनि पीडक उपस्थित नहुने, प्रहरीले पनि टार्ने कुरा मात्रै गरेपछि गुनासो गरेको समसाद बताउँछन् । 'हामी पटकपटक प्रहरीमा जान्छौं, तर विपक्षी आउँदैनन्, प्रहरी पीडकसँगै मिलेकोजस्तो कुरा गर्छन्, थर्काउँछन्,' उनले कान्तिपुरसित भने, 'आज गुनासो पोख्दा प्रहरीले उल्टै दुर्व्यवहार गरे ।'