जनकपुर — आर्थिक वर्ष २०८३/८४ को बजेटमाथि १७ दिनपछि मधेश प्रदेशसभामा सुरु भएको छलफल विपक्षी दलको अवरोधपछि स्थगित भएको छ । 

बजेटमाथि छलफल गर्न बुधबार दिउँसो १ बजे बोलाइएको प्रदेशसभा बैठकमा साढे २ बजे बसेको थियो । सभामुख रामआशिष यादवले बैठक सुरु भएको घोषणा गरेलगत्तै विपक्षी दल जसपा नेपाल र सत्तापक्ष कांग्रेसकै सांसदहरू उभिएका थिए । 

कांग्रेसका प्रमुख सचेतक कुमरकान्त झाले चालु आर्थिक वर्षका विकास योजनामा धेरैजसो काम सम्पन्न भए पनि अर्थ मन्त्रालयले रोक्का गर्दा भुक्तानी हुन नसकेको भन्दै आपत्ति जनाएका थिए । ‘धेरै कामहरू सम्पन्न भइसकेका छन् । तर, ठेकेदारहरूले भुक्तानी पाएका छैनन्,’ कांग्रेसका सचेतक झाले भने, ‘काम सम्पन्न भएको योजनाको भुक्तानी के कारणले रोकिएको हो ? अर्थमन्त्रीजीले जवाफ दिनुपर्छ ।’