पर्सा — पर्याप्त मनसुनी वर्षा नहुँदा पर्सामा हालसम्म जम्मा ४ प्रतिशत मात्रै धान रोपाइँ भएको छ। देशकै अन्न भण्डार मानिने मधेश प्रदेशको पर्सामा रोपाइँको गति सुस्त बनेको कृषि ज्ञान केन्द्रले जनाएको छ।

कृषि ज्ञान केन्द्र पर्साका प्रमुख रामजीवन ठाकुरका अनुसार हालसम्म जिल्लाका किसानले करिब ४ प्रतिशत क्षेत्रमा मात्रै धान रोप्न सकेका छन्।

उनका अनुसार ठोरी गाउँपालिका र पर्सागढी नगरपालिकामा कुलो तथा अन्य सिँचाइ सुविधा भएकाले तुलनात्मक रूपमा बढी रोपाइँ भएको छ। ‘सिँचाइ सुविधा भएका क्षेत्रमा किसानले असारे धान रोपेका छन्,’ उनले भने, ‘अन्य अधिकांश स्थानमा किसानले अझै धानको बेर्ना तयार गर्ने काम गरिरहेका छन्।’

यस वर्ष पर्सामा करिब ४० हजार हेक्टर क्षेत्रफलमा वर्षे धान खेती हुने अनुमान गरिएको छ। गत वर्ष पनि करिब यही क्षेत्रफलमा धान खेती गरिएको थियो।