वीरगन्जका मुर्ली, छपकैंयालगायत स्थानबाट ताजिया, धार्मिक र्याली तथा कलाबाजी प्रदर्शन गर्दै मुस्लिम समुदायले मोहर्रम पर्व शान्तिपूर्ण रूपमा सम्पन्न गरेका छन्।
पर्सा — मुस्लिम समुदायले शुक्रबार वीरगन्जमा मोहर्रम पर्व श्रद्धा र उत्साहका साथ मनाएका छन्। मुर्ली, छपकैंयालगायत विभिन्न स्थानबाट छुट्टाछुट्टै निकालिएका ताजिया तथा धार्मिक र्यालीहरू बाजागाजा र परम्परागत लाठी कलाबाजी प्रदर्शनसहित घण्टाघर हुँदै नगर परिक्रमा गरेका हुन्।
मोहर्रमका अवसरमा इमाम हुसैनको बलिदानको स्मरण गर्दै धार्मिक आस्था र सांस्कृतिक परम्पराको प्रदर्शन गरिएको थियो। र्यालीमा युवादेखि बालबालिका, महिला तथा ज्येष्ठ नागरिकसम्मको उल्लेख्य सहभागिता देखिएको थियो। सहभागीहरूले धार्मिक झण्डासँगै राष्ट्रिय झण्डा समेत बोकेर परम्परागत प्रस्तुति दिएका थिए ।
मोहर्रमका अवसरमा सम्भावित भीडलाई मध्यनजर गर्दै सुरक्षा व्यवस्था पनि कडा पारिएको थियो। पर्व शान्तिपूर्ण रूपमा सम्पन्न भएको स्थानीय प्रशासनले जनाएको छ।
