सिरहा — सिरहामा कारको ठक्करबाट गएराति एक जनाको ज्यान गएको छ । मिर्चैया नगरपालिका-८ भगवतपुरमा बुधबार मध्यरातमा कारले ठक्कर दिँदा स्थानीय ५० वर्षीय गुनाई ठाकुरको ज्यान गएको हो ।

प्रहरीका अनुसार, गर्मी भएर घरअगाडि पोल छेउमा कुर्सीमा बसिरहेका गुनाईलाई राति करिब साढे ११ बजेको समयमा अत्यधिक गतिमा आएको बागमती प्रदेश ०१-०२५ च ८९७१ नम्बरको इभी कार अनियन्त्रित भई ठक्कर दिएको थियो । त्यसपछि पोलमा ठोक्किँदै कार नालामा खसेको थियो ।

घटनालगत्तै त्यहाँ जम्मा भएका स्थानीयहरूले गुनाईलाई एम्बेलुन्समा हालेर अस्पताल पठाउने तयारी गरिरहेकै बेला फेरि अर्को पिकअप गाडी आउँछ, त्यसले उद्धारमा खटिएका अन्य स्थानीयहरूलाई पनि ठक्कर दिँदै कारको चालकलाई लिएर भाग्छ ।

त्यसक्रममा गुनाईसँगै वर्ष ३९ का स्थानीय रामपुकार ठाकुर, ३२ वर्षीया सुभली कुमारी यादव, एक १० वर्षीय र एक ६ वर्षीय बालक गरी पाँच जना तथा अन्य केही स्थानीयलाई पनि चोट लागेको जिल्ला प्रहरी कार्यालय, सिरहाले जनाएको छ । जसमध्ये गुनाईको उपचारका विराटनगर लगिरहेकै बेला बाटोमै मृत्यु भएको छ ।