जनकपुर —  

आर्थिक वर्ष ०८३–०८४ मा मधेश प्रदेश सरकारले स्वास्थ्य क्षेत्रमा ५ अर्ब ९५ करोड रुपैयाँ विनियोजन गरेको छ । पूर्वाधार विकासपछि मधेश प्रदेश सरकारले सबैभन्दा बढी प्राथमिकतामा राखेको क्षेत्र स्वास्थ्य नै हो । 

मधेश प्रदेश सरकारले ‘मेरो स्वास्थ्य, मेरो जिम्मेवारी’ नारा दिदै स्थानीय तहको सहलागतमा प्रदेशका सबै वडामा नागरिक अरोग्य सेवा केन्द्र स्थापना गर्ने र स्वास्थ्य उपकरण खरिद गर्ने भएको छ । मधेश प्रदेशका नागरिकले विशिष्टीकृत उपचारका लागि अन्यत्र जानुपर्ने बाध्यताको अन्त्य गर्न प्रादेशिक अस्पताल जनकपुरलाई मुटु, मिर्गौला र क्यान्सर रोगको उपचार सेवासहितको सुविधासम्पन्न शिक्षण अस्पतालमा स्तरोन्नती गरिने नीति पनि प्रदेश सरकारले लिएको छ ।

तराई–मधेशमा मुख्य स्वास्थ्य समस्या रहेको सर्पदशको उपचारलाई सर्वसुलभ बनाउन आधारभूत स्वास्थ्य केन्द्रमा एन्टिस्नेक भेनमसहितको सर्पदंश उपचार केन्द्र विस्तार गर्न बजेट विनियोजन गरेको छ । अति विपन्न, दलित र सीमान्तकृत समुदायलाई गुणस्तरीय स्वास्थ्य सेवाको पहुँचमा ल्याउन मधेश प्रदेश सरकारले उनीहरुको स्वास्थ्य बिमाको प्रमियम बेहोर्ने गरी स्थानीय तहसँग लागत साझेदारीमा पूर्ण स्वास्थ्य बिमा कभरेज अभियान लागू गर्ने भएको छ ।