नयाँ घरमा २ वटा बस्ने कोठा र एउटा भान्सा कोठा छन् । नगर प्रमुख महेशप्रसाद चौधरीका अनुसार यी घरहरूको आयु ३० वर्षभन्दा बढी हुनेछ ।
सिरहा — लहान नगरपालिकाले बुधबार १६ दलित सुकुम्बासी परिवारलाई पक्की घर प्रदान गरेको छ । लहान-२१ बेतहा गाउँका १६ दलित सुकुमवासी परिवारलाई बुधबार नगरपालिकाले बनाएको पक्की घर हस्तान्तरण गरेको हो ।
घर पाउनेमा अति विपन्न मानिने मुसहर, रामलगायतका समुदायका रहेको लहान नगरपालिकाले जनाएको छ । उनीहरू यसअघि फुसको घरमा बस्दै आएका थिए । नगरपालिका र हेविटेट फर ह्युम्यानिटी नेपालको संयुक्त लगानीमा बनेका यी घरहरूमा २ वटा बस्ने कोठा र एउटा भान्सा कोठा छन् । घरमाथि जस्ता हालिएको छ भने तल बाँसको प्रयोग गरी प्लास्टर गरिएको छ ।
नगर प्रमुख महेशप्रसाद चौधरीका अनुसार, यी घरहरूको आयु ३० वर्षभन्दा बढी हुनेछ । नगरपालिकाले केही दिनअघि लहान-१३ का २० र मंगलबार मात्रै लहान-२२ का २४ दलित सुकुमवासी परिवारलाई यस्तै घर हस्तान्तरण गरेको थियो ।
