लिखतसम्बन्धी कसुर तथा झूटा विवरणका आधारमा नागरिकता बनाउन सहयोग गरेको आरोपमा पक्राउ परेकै दिन मेयर सिंह छुटेका छन् ।
What you should know
पर्सा — लिखतसम्बन्धी कसुर (किर्ते) तथा झूटा विवरणका आधारमा नागरिकता बनाउन सहयोग गरेको आरोपमा पक्राउ परेका वीरगन्ज महानगरपालिकाका मेयर राजेशमान सिंह अदालतले तोकेको धरौटी बुझाएर मंगलबार रिहा भएका छन् । सिंह मंगलबार बिहान सवा ६ बजे पर्साको ठोरीस्थित जंगल रिसोर्टबाट पक्राउ परेका थिए ।
जिल्ला अदालतमा उपस्थित गराइएकामा बयान र थुनछेक बहसपछि सिंहलाई धरौटीमा छाड्ने आदेश जारी भएको थियो । जिल्ला न्यायाधीश गायत्रीप्रसाद रेग्मीको इजलासले लिखत किर्ते मुद्दामा ४ लाख रुपैयाँ र झूटा विवरण दिई नागरिकता लिएको मुद्दामा १५ हजार गरी कुल ४ लाख १५ हजार रुपैयाँ धरौटी माग गर्ने आदेश गरेको थियो । अदालतको आदेशअनुसार धरौटी रकम बुझाएपछि सिंह साँझ अदालतबाट रिहा भएका हुन् ।
थुनछेक बहसमा सिंहका तर्फबाट अधिवक्ताद्वय कमलमोहन पोखरेल र शिव कोइरालाले बहस गरेका थिए । मेयर सिंह रिहा हुनुअघि प्रहरीले नारायणी अस्पतालका चिकित्सकलाई अदालतमै बोलाएर सिंहको स्वास्थ्य परीक्षणसमेत गराएको थियो । अदालतले जारी गरेको पक्राउ पुर्जीका आधारमा मेयर सिंह समातिएका थिए ।
निकटस्थका अनुसार पक्राउ पुर्जी जारी हुनुभन्दा ३/४ दिनअघि मेयर सिंह राजधानी काठमाडौं पुगेका थिए । पक्राउ पुर्जी जारी भएको भोलिपल्ट १३ जेठमा उनी जिल्ला अदालतको मूल भवनअघिल्तिर उभिएर खिचिएको तस्बिर सामाजिक सञ्जालमा सार्वजनिक भएको थियो । तर त्यो दिन उनी अदालतमा उपस्थित भएनन् । त्यसपछि उनी भारतको बिहारस्थित सिवान भन्ने सहरमा आयोजित धार्मिक अनुष्ठानमा सरिक भएको तस्बिर सामाजिक सञ्जालबाटै सार्वजनिक भएको थियो ।
सिंहका स्वकीय सचिव सत्यराज घिमिरेलाई प्रहरीले सोमबार बिहान १० बजे जिल्ला अदालत परिसरबाटै सोधपुछका लागि भन्दै नियन्त्रणमा लिएर साँझ छाडेको थियो । मेयर सिंहमाथि नक्कली कागजातका आधारमा अर्काकी छोरीलाई आफ्नै छोरी देखाई नागरिकता, जन्मदर्ता तथा अन्य सरकारी कागजात बनाउन सहयोग गरेको आरोप छ । यही आरोपसँग सम्बन्धित मुद्दा हाल अदालतमा विचाराधीन छ ।
यो प्रकरण २०७५ सालमा जारी नागरिकतासँग जोडिएको छ । वीरगन्ज–३ निवासी भनिएकी रुबिना श्रेष्ठको नागरिकतामा राजेशमान सिंहलाई बाबु उल्लेख गरिएको छ । उजुरीकर्ताहरूले भने रुबिना मेयर सिंहकी ‘जैविक छोरी’ नभएको दाबी गर्दै नागरिकता बनाउन प्रयोग गरिएका कागजात किर्ते भएको आरोप लगाएका छन् ।
उजुरीकर्ता वीरगन्जका लियाकत अलीले यस विषयमा विभिन्न निकायमा उजुरी दिएका थिए । त्यसपछि गृह मन्त्रालय, जिल्ला प्रशासन कार्यालय तथा प्रहरीमार्फत छानबिन प्रक्रिया अघि बढेको थियो । छानबिनका क्रममा नागरिकता बनाउन प्रयोग गरिएका विवरण, सिफारिस तथा सम्बन्धित कागजातमाथि प्रश्न उठेपछि मुद्दा अदालतसम्म पुगेको हो ।
नागरिकता विवाद सार्वजनिक भएपछि सिंहले छानबिनका क्रममा रुबिना आफ्नी दोस्रो पत्नीबाट जन्मिएकी छोरी भएको दाबी गरेका थिए । त्यसपछि दोस्रो पत्नीका रूपमा उल्लेख गरिएकी महिलाले अदालतमा सम्बन्धविच्छेदको मुद्दा दायर गरेपछि यो प्रकरणले थप चर्चा पाएको थियो । सिंहको उक्त दाबी र त्यससँग सम्बन्धित कागजातको विश्वसनीयताबारे पनि अनुसन्धान गरिएको थियो । मंगलबार धरौटी बुझाएर रिहा भएसँगै सिंहले अब तारेखमा रहेर मुद्दाको सामना गर्नेछन् ।
