जनकपुर — जनकपुरस्थित मधेश प्रदेशकै ठूलो फलफूल मण्डी हटाउन जग्गाधनीले बलजफ्ती गरेको व्यवसायीहरूले गुनासो गरेका छन् । फलफूल मण्डी खाली गर्ने जग्गाधनीको उर्दी र उच्च अदालतको परमादेशमाथि टेकेर व्यवसायी त्यहाँबाट सर्न खोज्दा अवरोध गरिएको छ । 

फलफूल तथा तरकारी व्यवसायी संघका पदाधिकारी मंगलबारदेखि फलफूल मण्डीमा धर्नामा बसेका छन् । संघको अडानमा जनकपुरधाम उद्योग वाणिज्य संघले साथ दिएको छ । जनकपुरको शुक्रबारे हटियामा रहेका फलफूल मण्डीलाई त्यहाँबाट हटाएपछि २० वर्षका लागि नवलकिशोर साहको ९ कठ्ठा जग्गा बहालमा लिएर जनकपुरमा फलफूल मण्डी राखियो । सम्झौताअनुसार २० वर्षको म्याद सकिएपछि जग्गाधनी साहले मण्डी खाली गर्न गरेको आग्रहअनुसार व्यवसायीहरू त्यहाँबाट सर्न खोज्दा अवरोध गरिएको व्यवसायीहरूको गुनासो छ । 

‘मण्डीमा रहेका फलफूल र भौतिक संरचना लैजान खोज्दा जग्गाधनीले डोजर लगाएर ५ फिट गहिरो खाल्टो खनिदिएका छन्,’ फलफूल तथा तरकारी व्यवसायी संघका सचिव भूपनेश्वर पूर्वेले सञ्चारकर्मीसँग भने, ‘मण्डी खाली गर्न नै अवरोध गरिएको छ । प्रहरीले पनि जग्गाधनीलाई नै साथ दिएको छ ।’ _{जनकपुरस्थित फलफूल मण्डी ।}

यहाँका २ सय ५० जना फलफूल व्यवसायी यस फलफूल मण्डीबाट कारोबार गर्छन् । पूर्वेका अनुसार भारतबाट फलफूल बोकेका मालवाहक गाडी दैनिक ५०–६० वटा मण्डीमा आउने गरेको र यहाँबाट वीरगन्ज, हेटौंडा र चितवनसम्म फलफूलको कारोबार हुने गरेको छ । 

फलफूल मण्डी खाली गर्न व्यवसायीले जग्गाधनीसँग दुईवटा माग राख्दै धर्नामा बसेका हुन् । एउटा, मण्डी खाली गर्न गरिएको अवरोध हटाउन र दोस्रो, आँपको पिक सिजन रहेकाले कम्तीमा दुई महिना मण्डी खाली गर्न समय थप्न माग गरिएको छ । 

जनकपुरधाम उद्योग वाणिज्य संघका अध्यक्ष सुरेन्द्र भण्डारीले विगतदेखि नै फलफूल व्यवसायीलाई लखेट्ने क्रम चलेको आरोप लगाए । उनका अनुसार शुक्रबारे हटियाको कृषि बजारबाट हटाइएका फलफूल व्यवसायीले आफ्नै बलबुतामा निजी जग्गामा मण्डी लगाए । ‘यहाँबाट पनि अपमानजनक ढंगले लखेट्ने काम भएको छ,’ अध्यक्ष भण्डारीले भने, ‘कृषि उपज बस्तुको बजारमा सरकारले ध्यान दिनुपर्ने हो । तर, यहाँ धपाउने काम मात्र भइरहेको छ ।’ भण्डारीले ५–१० दिनमा फलफूलको मण्डी खाली गर्न सम्भव नरहेकाले आपसी समझदारीमा समय थप्नुपर्ने माग गरे ।