राजविराज — नापी कार्यालय सप्तरीको प्रमुख भएर आउँदा २० किलोको फूलको मालाले स्वागत भएपछि आलोचित बनेका शत्रुघ्नप्रसाद यादवको काज सरुवा भइसक्दा पनि जान मानेका छैनन् । २० किलोको फूलको मालाले स्वागत गर्दा उनी आलोचित बनेका थिए । भूमि व्यवस्था, सहकारी, संघीय मामिला तथा समान्य प्रशासन मन्त्रालयले एक महिनाअघि नै उनको काज सरुवा गरिसकेको छ । तर, राजपत्राङ्कित द्वितीय क्षेणीका यादवले अझैसम्म रमानासमेत बुझेका छैनन् । 

नापी कार्यालय इनरुवा, सुनसरीमा दरबन्दी रहेका उनी ५ महिनाअघि काजमा पुनः नापी कार्यालय सप्तरी आएका थिए । त्यसअघि पनि यादव सप्तरीमै साढे ३ वर्षसम्म नापी प्रमुखको जिम्मेवारीमा थिए । त्यसबखत १९ कात्तिक २०७७ मा यहाँ आएका नापी प्रमुख यादवको २४ चैत २०८० मा सरुवा भएको थियो । 

गत पुस २८ मा काजमा पुनः सप्तरी आउँदा यादवलाई कर्मचारीलगायतले करिब २० किलोको फूलको मालाले स्वागत गर्दा उनी आलोचित बनेका थिए । हाल उनको ४ वैशाखमै काज सरुवा भइसकेको छ । तत्कालीन भूमि व्यवस्था, सहकारी तथा गरिबी निवारण मन्त्रालयले चलानी नम्बर १२२७ उल्लेखित पत्र पठाउँदै यादवलाई नापी विभागमा काज सरुवा गरेको हो । 

मन्त्रालयको सचिवस्तरीय निर्णयअनुसार निजामती सेवा ऐन, २०४९ को दफा १८ क (१) बमोजिम यादवलाई काजमा विभाग पठाएको हो । तर, ३५ दिन बित्न लाग्दा पनि उनी यहाँबाट जान चाहेका छैनन् । ती विषयमा प्रश्न गर्दा नापी प्रमुख यादवले भने, ‘मलाई मिडियासँग कुरा गर्नु छैन ।’