राजविराज — पाँच दशकदेखि व्यक्तिले कब्जा जमाएको कोष तथा लेखा नियन्त्रक कार्यालय (कालेनिका) सप्तरीको अतिक्रमित जग्गा खाली गराउन राजविराज नगरपालिकाले सार्वजनिक सूचना जारी गरेको छ ।

अख्तियार दुरुपयोग अनुसन्धान आयोगले छानबिनपछि ५ महिनाअघि नै त्यहाँको अतिक्रमित २ कठ्ठा १४ धुर सरकारी जग्गा संरक्षण गर्न पत्राचार गरेको थियो । सोही आधारमा २२ मंसिर २०८२ मा प्रमुख जिल्ला अधिकारी टुवराज पोखरेलको संयोजकत्वमा बसेको बैठकबाट पनि सरकारी जग्गाको अतिक्रमण खाली गराइने निर्णयअनुसार कोलेनिकाले नगरपालिकालाई ताकेता गर्दै आएको थियो ।

नगरपालिकामा गत सोमबार बसेको कार्यपालिकाको निर्णयअनुसार अतिक्रमण खाली गर्न ७ दिने सूचना जारी गरेको हो । ‘जगदीश झाको छोरा उज्जवल झालगायतका व्यक्तिहरुले अतिक्रमण गरी बसिरहेको जग्गा खाली गर्न कालेनिकाबाट २८ वैशाखमा चंनं ४२० को पत्रले ताकेता भई आएबमोजिम नगर कार्यपालिकाको बैठकबाट सर्वसम्मति निर्णय भएको’, बुधबार जारी गरेको सूचनामा उल्लेख छ । उक्त समयभित्र जग्गा खाली नगरेको पाइएमा नगरपालिकाले खाली गराउँदा हुने क्षतिको जिम्मेवार सम्बन्धित व्यक्ति हुने भनी जनाइएको छ।