सिरहा — लहान नगरपालिका-१६ तरेगनास्थित स्वास्थ्य चौकीमा अन्य दिनको तुलनामा सोमबार बढी भीडभाड थियो । त्यसमा पनि खासगरी महिला धेरै थिए । उनीहरू यसरी यहाँ पाठेघरको जाँच गराउन आइपुगेका हुन् ।

लहान नगरपालिकाको सहयोगमा लहान क्यान्सर केयर सेन्टरले स्वास्थ्य चौकीमा पाठेघर जाँच शिविर चलाएको थियो । यहाँ पहिलोपल्ट यस्तो शिविर चलाइएको भने होइन, यसरी नै नगरपालिकाका २४ वटै वडामा एक वर्षदेखि पाठेघर जाँच शिविर चल्दै आएको छ ।

यस अवधिमा नगरपालिकाभरिमा झन्डै ६ सय जना महिलाको पाठेघर चेकजाँच भएको नगर प्रमुख महेशप्रसाद चौधरीले जनाए । पाठेघरको जाँच अत्यन्तै आवश्यक भए पनि जाँच नै नगराउने प्रवृत्ति रहेको र यसलाई अन्त्य गर्ने उद्देश्यले गाउँटोलमै शिविर चलाइरहेको उनले बताए ।