यादवले फेरि आफ्ना कुरा राख्न खोज्दा कार्यक्रमका सहभागी लाभग्राही स्थानीयले हल्ला गर्दै भन्न थाले, ‘लालपुर्जाका लागि हामीसँग ५ हजार रुपैयाँ लिनुभएको छ । पैसा तिर्नेलाई यही हात उठाउन भन्नुस् । सबै कुरा स्पष्ट भइहाल्छ ।’ 

लाभग्राही विजुली पण्डितले भने, ‘लालपुर्जावापत अमिन श्रीप्रसाद यादवले ५ देखि १४ हजार रुपैयाँसम्म लिनुभएको छ । मेरो ९ धूर जग्गा मात्र छ तर ५ सय रुपैयाँ मात्र अपुग हुँदा पनि लिन मान्नुभएन । बाध्य भएर सरसापटी गरेर ५ हजार तिर्नुपर्‍यो ।’ 

कार्यक्रममा उपस्थित नगरप्रमुख मलाहदेखि सांसद चौधरीसम्म पनि लाभग्राहीको गुनासो सुनेर हेरेको–हेर्‍यै भए । लाभग्राही आक्रोशित देखिएपछि नापी प्रमुख यादवसहितका अन्य कर्मचारीलाई त्यहाँबाट निस्किन हम्मे परेको थियो ।

नापी प्रमुख यादवले आफ्ना कर्मचारीले गैरकानुनी लेनदेन गरेको प्रमाणित भए कानुन अनुसार कारबाही हुने बताए । ‘प्रमाण ल्याउनुस् भनेर मैले त्यहाँ पनि भनिरहे, अझ पनि कसैले प्रमाण दिए कारबाही गर्छौं,’ उनले भने । सांसद चौधरीले घुस लिने कर्मचारीलाई कानुनी दायरामा ल्याउन पहल गर्ने बताए । उक्त कार्यक्रममा गाउँ ब्लकमा ३ सय ४६ परिवारलाई पहिलो चरणमा जग्गाधनी प्रमाणपत्र वितरण गरिएको छ ।