जिल्ला प्रशासनले सूचना जारी गर्दै त्रिभुवन राजपथ अन्तर्गत नेपाल–भारत मितेरी पुलदेखि गण्डक नहर चोकसम्मको सडक क्षेत्रभित्र रहेका संरचना हटाउन निर्देशन दिएको थियो ।
पर्सा — वीरगन्ज महानगर क्षेत्रमा आइतबारदेखि सडकको दायाँबायाँ २५ मिटरभित्रका संरचना भत्काउन सुरु गरेको डिभिजन सडक कार्यालय हेटौंडाले सोमबार पनि गण्डक क्षेत्रमा केही संरचना भत्काएको छ ।
कार्यालयका इन्जिनियर मदनमोहन सिंहले आइतबार गण्डक क्षेत्रमा भत्काउन नभ्याइएका संरचना सोमबार भत्काइएको जानकारी दिए ।यसरी दुई दिनमा गरी त्रिभुवन राजपथ अन्तर्गतको गण्डक–मितेरी पुल सडक क्षेत्रमा रहेका करिब १ हजार २ सय घरटहरामा डोजर चलाइएको उनले बताए । अब भत्किएका संरचनाबाट निस्किएका फोहोर सकेसम्म छिटो हटाउन सम्बन्धित घरधनीहरुलाई आग्रह गरिएको पनि उनको भनाइ छ ।
केन्द्रबाट बजेट प्राप्त भएलगत्तै सडक विभागले अतिक्रमण हटाइएको गण्डक चोकदेखि मितेरी पुलसम्मको खण्डमा ६ लेनको सडक निर्माणको ठेक्का लगाउने पनि उनले बताए । 'यसअघिको सर्वोच्च अदालतको फैसला र संंघीय सरकारको निर्णयअनुसार यो कारबाही गरिएको हो,' उनले भने ।
जिल्ला प्रशासन कार्यालय पर्साले शनिबार साँझ सूचना जारी गर्दै त्रिभुवन राजपथ अन्तर्गत नेपाल–भारत मितेरी पुलदेखि गण्डक नहर चोकसम्मको सडक क्षेत्रभित्र रहेका संरचना हटाउन निर्देशन दिएको थियो ।
वीरगन्ज महानगर प्रमुख राजेशमान सिंहले पनि सामाजिक सन्जालमार्फत सडक डिभिजन कार्यालय हेटौंडा र सुरक्षा निकाय द्वारा जारी सूचनाको पालना गर्न नगरवासीलाई अनुरोध गरेका थिए ।
सर्वोच्च अदालतले २०८१ फागुन २८ गते वीरगन्जको मुख्य सडक विस्तारविरुद्ध परेका रिट खारेज गरेको थियो । न्यायाधीश बिनोद शर्मा र महेश शर्मा पौडेलको संयुक्त इजलासले फागुन २८ गते रिट निवेदकको ५ वटै रिट खारेज गरेसँगै डिभिजन सडक हेटौंडाले त्रिभुवन राजपथका दायाँबायाँ २५ मिटर चौडा सडक चौडा गर्ने बाटो खुलेको थियो ।
