सिरहा — जिल्ला प्रशासन कार्यालय, सिरहाले सार्वजनिक सवारीसाधनमा आगामी २० दिनभित्र सीसीटीभी जडान गर्न निर्देशन दिएको छ । जिल्ला यातायात व्यवस्थापन समितिको निर्णयअनुसार सिरहा प्रशासनले यस्तो निर्देशन दिएको हो ।

जिल्ला सदरमुकाम सिरहा, मिर्चैया, लहानलगायतका स्थानबाट लामो तथा छोटो दूरीमा चल्ने सार्वजनिक यातायातमा अनिवार्य रूपमा सीसीटीभी जडान गर्नुपर्ने सूचनामा उल्लेख छ । यसको अनुगमन यातायात व्यवस्था कार्यालय, लहान र जिल्ला ट्राफिक प्रहरी कार्यालय, लहानले गर्नेछ ।

सीसीटीभी जडान गर्न दिइएको म्यादपछि यसको नियमित अनुगमन हुने तथा निर्देशनको अवज्ञा गरी सीसीटीभी जडान नगरेको भेटिए त्यस्ता सवारीसाधनलाई कारबाही गरिने सिरहाका सहायक प्रमुख जिल्ला अधिकारी चेतराज बरालले बताए ।