पर्सा — नेपाल–भारतबीचको आर्थिक सहकार्यलाई थप सुदृढ बनाउने उद्देश्यले वीरगन्जमा आइतबार गोष्ठी आयोजना गरिएको छ। 

भारतको महावाणिज्य दूतावास, वीरगन्ज र वीरगन्ज उद्योग वाणिज्य संघको सहकार्यमा आयोजित ‘नेपाल–भारत आर्थिक सहकार्य : नयाँ व्यापारिक सम्भावनाहरूको उद्घाटन’ विषयक गोष्ठीमा नेपाल र भारतको बिहार राज्यका विभिन्न उद्योग वाणिज्य संघ तथा उद्योग संघका प्रतिनिधि र पदाधिकारीको उल्लेखनीय सहभागिता रहेको थियो।

कार्यक्रममा महावाणिज्यदूत डी एस मीनाले नेपाल-भारतबीचको गहिरो आर्थिक सम्बन्धलाई जोड दिँदै द्विपक्षीय व्यापारलाई अझ प्रगाढ बनाउने दिशामा भइरहेको प्रयासबारे प्रकाश पारेका थिए । उनले काठमाडौंस्थित भारतीय राजदूतावास र वीरगन्जस्थित महावाणिज्य दूतावासले व्यापार सहजीकरणका लागि खेलेको भूमिकाबारे पनि चर्चा गरे ।

मीनाका अनुसार भारतले एकीकृत जाँच चौकी, सुक्खा बन्दरगाह, रेलवे तथा डिजिटल कनेक्टिभिटीजस्ता पूर्वाधार विकासमार्फत आर्थिक सम्बन्ध मजबुत बनाउँदै आएको छ। उनले स्टार्टअप, सूचना प्रविधि, पर्यटन र कृषि–प्रशोधनजस्ता क्षेत्रमा संयुक्त लगानीका पर्याप्त अवसर रहेको उल्लेख गर्दै नेपाली व्यवसायीलाई भारतीय साझेदारसँग सहकार्य गर्न आह्वान पनि गरे ।