इलाका प्रहरी कार्यालय चन्द्रनिगाहपुरले मंगलबार नक्कली सुनसहित ४ जनालाई पक्राउ गरेको हो ।
रौतहट — इलाका प्रहरी कार्यालय चन्द्रनिगाहपुरले मंगलबार स्थानीय जगत रिसोर्ट होटलबाट नक्कली सुनसहित ४ जनालाई पक्राउ गरेको छ ।
चन्द्रपुर नगरपालिका–४ स्थित जगत रिसोर्ट होटलबाट प्रहरीले जाँच गर्दा पम्प, क्रेडिट, सइस, फाइन गोल्ड लेखिएको नक्कली सुनजस्ता धातुका ७ वटा टुक्रासहित नुवाकोट जिल्ला घर भएका अशोक तामाङ, चन्द्रपुर नगरपालिकाका अर्जुन चौधरी, बोधीमाई नगरपालिकाका फेकनराय यादव र भारतको सिलिगुडीका सञ्जोग बस्नेतलाई पक्राउ गरिएको जिल्ला प्रहरीका डीएसपी विष्णुप्रदीप बस्यालले बताए ।
प्रहरीले उनीहरुको साथबाट चार थान मोबाइलसमेत बरामद गरेको छ ।
‘पक्राउ परेकाहरुमाथि थप अनुसन्धान भइरहेको छ,’उनले भने, ‘नक्कली सुन बेचबिखन गर्ने गिरोहको आशंकामा अनुसन्धान अघि बढाएको हौँ । उनीहरुको पृष्ठभूमि पत्ता लगाउँदैछौँ ।’
