पर्सा — पर्सामा यस वर्ष धान उत्पादनमा गिरावट आएको छ। कृषि ज्ञान केन्द्र पर्साका अनुसार गत वर्षको तुलनामा यस वर्ष २४ हजार ९ सय ९७ मेट्रिकटनले धान उत्पादन घटेको छ।

याे वर्ष जिल्लाभर ४७ हजार १ सय ३० हेक्टर क्षेत्रफलमा धान खेती गरिएकोमा प्रतिहेक्टर ३ दशमलव ६७ मेट्रिक टनको दरले १ लाख ७२ हजार ९ सय ६७ मेट्रिक टन धान उत्पादन भएको छ।

गत आर्थिक वर्षमा सोही क्षेत्रफलमा प्रति हेक्टर ४ दशमलव २ मेट्रिक टन उत्पादनदरका आधारमा १ लाख ९७ हजार ९ सय ४० मेट्रिक टन धान उत्पादन भएको थियो। यसरी यस वर्ष धानको उत्पादन १२ दशमलव १६ प्रतिशतले घटेको हो ।