राजपैडास्थित आधुनिक प्रावि स्कुलबाट करिब २ सय मिटर दक्षिणमा बोराभित्र शंकास्पद बस्तु राखिएको अवस्थामा फेला परेको थियो ।
रौतहट — जिल्लाको चन्द्रपुर-५, रजपैडा- थलहीटोल जाने मार्गमा फेला परेको शंकास्पद बस्तु मंगलबार बिहान नेपाली सेनाले निष्क्रिय पारेको छ । शंकास्पद बस्तुका कारण मानिसमा त्रास फैलिएको थियो ।
राजपैडास्थित आधुनिक प्रावि स्कुलबाट करिब २ सय मिटर दक्षिणमा बोराभित्र शंकास्पद बस्तु राखिएको अवस्थामा फेला परेको थियो । त्यसपछि संयुक्त फौजले सुरक्षाका लागि रातभर उक्त इलाका कर्डन गरिएको थियो । बिहान नेपाली सेनाको बम डिस्पोजल टोलीले शंकास्पद बस्तु निष्क्रिय पारेको जनाएको छ ।
उक्त बस्तु बम नभएको पाइएको नेपाली सेनाको नारायणदल गणले जनाएको छ । गणले हरेक निर्वाचन क्षेत्रमा बम डिस्पोजल टिम तैनाथ गरेको र राजमार्ग सुरक्षार्थसमेत टोली तैनाथ गरेको जनाएको छ। कुनै पनि स्थानमा शंकास्पद बस्तु फेला परेको अवस्थामा १० देखि ३० मिनेटभित्र पुग्न सक्ने क्षमता भएको सेनाले जनाएको छ ।
