राजविराज — सप्तरीको छिन्नमस्ता गाउँपालिका अध्यक्ष विद्यानन्द चौधरी सवार गाडीले ठक्कर दिँदा घाइते भएकी महिला उपचारपश्चात् निको भएको चार दिनसम्म पनि  अस्पतालमै छन् । आर्थिक अभावले खर्च चुक्ता गर्न नसकेपछि डिस्चार्ज हुन पाएकी छैनन् ।

राजविराज–१५, मसहरनियाकी ३५ वर्षीया शिवकुमारी मण्डललाई सोमबार साँझ पालिकाको गाडीले ठक्कर दिएको थियो । राजविराज–हनुमाननगर सडक खण्डअन्तर्गत राजविराज–२, तेतरीगाछीमा दुर्घटना भएको थियो । घाइतेलाई गाउँपालिका अध्यक्ष चौधरीले छिन्नमस्ता अस्पताल राजविराज पुर्‍याएर भर्ना गरेका थिए । त्यसपछि चौधरी अस्पताल फर्किएनन् । टाउको, बायाँ हात र शरीरका विभिन्न भागमा चोट लागेकी मण्डल उपचारपछि गत बुधबार नै निको भइसकेकी छन् । तर, उपचारमा लागेको खर्च तिर्न नसक्दा अहिले उनी अस्पतालमै छन् ।

‘ठक्कर दिएपछि गाडीमै भएकाले बोकेर अस्पतालसम्म ल्याए । उपचार खर्च सबै बेहोर्छु भनेर मेरैअगाडि भनेका थिए, यहाँबाट गएपछि हेर्नसम्म आएनन्,’ मण्डलले भनिन्, ‘सुरुका दुई दिन भोकभोकै बसेँ, अस्पतालले नै बाहिरको होटलमा खाना खाने व्यवस्था मिलाइदियो ।’