राजनीतिक दल, उम्मेदवार र सञ्चारकर्मीहरुबाटै निर्वाचन आचारसंहितको उल्लंघन गर्ने कार्य भइरहेको पाइएको हो ।
सिरहा — आसन्न प्रतिनिधिसभा निर्वाचनका लागि लागू गरिएको आचारसंहिता विपरितका गतिविधि सिरहामा नरोकिएको पाइएको छ ।
राजनीतिक दल, उम्मेदवार र सञ्चारकर्मीहरुबाटै निर्वाचन आचारसंहितको उल्लंघन गर्ने कार्य भइरहेको पाइएको हो ।
राजनीतिक दल तथा उम्मेदवारहरु ठूलो भेला गर्ने, निषेधित क्षेत्रसहितका विभिन्न स्थानमा झण्डा, व्यानर, पर्चालगायतका प्रचारात्मक सामग्री टाँस गर्ने गरेको यत्रतत्र भेटिन्छन् ।
यतिमात्र नभई कतिपय अनलाइन सञ्चारमाध्यमले सामाजिक सञ्जालमार्फत् निश्चित उम्मेदवारहरुको प्रभाव रहेको भनी चढाइबढाइ गरेर सामग्री सम्प्रेषण गर्ने गरेका छन् ।
ती सञ्चारमाध्यमहरुले मतदातालाई कसलाई मत दिने भनी सोधेर भिडियो बनाउने र सामाजिक सञ्जालमा पोष्ट गरी मतदाताको गोपनियता भंग गर्ने कार्य गर्दै आएका छन् । जिल्ला निर्वाचन आचारसंहिता अनुगमन समितिले पटक पटक सूचना जारी गरे पनि यसको कार्यान्यवन भने हुन सकेको छैन ।
अनुगमन समितिले यस्तो कार्य निर्वाचन आचारसंहिता २०८२ को दफा ४ बमोजिम गैरकानूनी हुने र यस्तो गतिविधिमा संलग्न हुनेलाई प्रचलित कानून बमोजिम कारबाही प्रक्रिया अगाडी बढाइने चेतावनी पुनः दिएको छ। शुक्रबार एक सूचना जारी गर्दै समितिले यस्तो चेतावनी दिएको हो ।
'यसअघि हामीले सम्झाइ-बुझाइ गर्ने गरेका थियौं, तर यसरी हुने भएन,' सिरहाका सहायक प्रमुख जिल्ला अधिकारी तथा अनुगमन अधिकृत चेतराज बरालले कान्तिपुरसित भने, 'अब यस्तो कार्य गर्ने व्यक्तिलाई सिधै कानूनी दायरामा लैजान्छौं ।'
