गाडीको ठक्करबाट गम्भीर घाइते दीपेन्द्र बैठाको उपचारका क्रममा मृत्यु भएको जिल्ला प्रहरी कार्यालय गौरका प्रहरी निरीक्षक रुद्रराज कँडेलले जानकारी दिए ।
रौतहट — रौतहटको बौधीमाईमा सोमबार विद्युतीय (ईभी) गाडीले ठक्कर दिँदा मोटरसाइकल चालकको मृत्यु भएको छ ।
बौधीमाई नगरपालिका–१, भुवाली चौकमा पिपरीयाबाट अजगैबी जाने भित्री सडक खण्डमा बाग्मती प्रदेश ०३–००१ ज ७६६ नम्बरको विद्धुतीय गाडीले प्लाटिना मोटरसाइकललाई ठक्कर दिँदा बौधीमाईस्थित इनर्वाका २३ वर्षीय दीपेन्द्र बैठाको मृत्यु भएको जिल्ला प्रहरी कार्यालय गौरका प्रहरी निरीक्षक रुद्रराज कँडेलले जानकारी दिए ।
गाडीको ठक्करबाट गम्भीर घाइते भएका बैठालाई उपचारका लागि प्रादेशिक अस्पताल गौरमा भर्ना गरिएको थियो । बैठाको उपचारका क्रममा मृत्यु भएको हो । बैठाले चलाएको मोटरसाइकल 'वन टेस्ट' थियो ।
ठक्कर दिने गाडी र जिल्लाको राजपुर नगरपालिका–५ घर भएका चालक उपेन्द्र साहलाई नियन्त्रणमा लिइएको प्रहरीले जनाएको छ । मृतकको शव प्रादेशिक अस्पताल गौरमै राखिएको छ । घटनाको अनुसन्धान भइरहेको प्रहरी निरीक्षक कँडेलले बताए ।
