पर्सा — वीरगन्ज उद्योग वाणिज्य संघ र भारतको रक्सौल चेम्बर अफ कमर्शबीच आपसी व्यापारिक सम्बन्ध सुदृढ गर्ने उद्देश्यले स्वागत तथा सौहार्दपूर्ण भेटघाट कार्यक्रम सम्पन्न भएको छ ।

वीरगन्ज उद्योग वाणिज्य संघको आयोजनामा बिहीबार सम्पन्न कार्यक्रममा संघका कार्यवाहक अध्यक्ष माधव राजपालले रक्सौल चेम्बर अफ कमर्शका पदाधिकारीलाई स्वागत गरेका थिए । राजपालले नेपाल–भारत सीमावर्ती क्षेत्र रक्सौलमा दिनप्रतिदिन बढ्दै गएको सवारी जाम, अव्यवस्थित गाडी पार्किङ, नेपाली नागरिकप्रति भारतीय सुरक्षाकर्मीको असमान व्यवहार र दृष्टिकोण तथा रक्सौल क्षेत्र लागूऔषध कारोबारको अखडा बन्दै गएको विषयप्रति गम्भीर चिन्ता व्यक्त गरेका थिए ।

रक्सौल चेम्बर अफ कमर्शका अध्यक्ष राकेशकुमार कुशवाहले रक्सौल क्षेत्रमा देखिएको सवारी जामको स्थायी समाधानका लागि ओभरब्रिज निर्माणसम्बन्धी योजना स्वीकृत भइसकेको र छिट्टै निर्माण कार्य सुरु हुने जानकारी दिए । साथै, लागूऔषध कारोबार नियन्त्रणका लागि रक्सौलका प्रहरी प्रमुख स्वयं सक्रिय रहेको बताउँदै हालको अवस्था अघिल्लो समयको तुलनामा धेरै हदसम्म सुधारिएको दाबी गरे । नेपाली नागरिकप्रति भारतीय प्रहरीको व्यवहारबारे उठाइएका गुनासोप्रति संवेदनशीलता व्यक्त गर्दै उनले यस विषयमा सम्बन्धित निकायसँग समन्वय गरी आवश्यक पहल गरिने प्रतिबद्धता पनि जनाए।