पर्सा — प्रहरीले स्रोत नखुलेको हुण्डी कारोबारको रकमसहित तीन भारतीयलाई पक्राउ गरेको छ । पक्राउ पर्नेमा भारत बिहार बेतिया, मथौली घर भई हाल वीरगन्ज महानगरपालिका-२ छप्कैयामा बस्ने ५० वर्षीय अनवर मिया, उनका छोरा २२ वर्षीय कैफ र भारत बिहार मोतिहारीकाे गम्हरियाकला-३ का ४८ वर्षीय फूल महम्मद रहेका छन् ।

प्रहरीले विशेष सूचनाका आधारमा वीरगञ्ज महानगरपालिका–१० मकालु चोकबाट  सोमबार अनवर मिया र उनका छोरा कैफलाई पक्राउ गरेको हो । बीआर २२ एच ६३३८ भारतीय नम्बरको मोटरसाइकल चढेर आइरहेको अवस्थामा उनीहरूलाई रोकी खानतलासी गर्दा  अनवर मियाले लगाएको पाइन्टको खल्तीबाट १ हजार दरका ५२, पाँच सय दरका १ सय ५७ र ५० दरका ९ गरी १ लाख ३० हजार ९ सय ५० रुपैयाँ र मोटरसाइकलको पछाडि सवार कैफले लगाएको पाइन्टको खल्तीबाट १ हजार दरका २ सय र ५ सय दरका दुई सय गरी तीन लाख रुपैयाँ बरामद भएको थियो ।