राजविराज — ज्याला मजदुरी गरेर गुजारा चलाउँदै आएका सप्तरीको राजविराज नगरपालिका–५ स्वर्ण टोलका अनबहादुर आले मगरको मृत्यु भएपछि परिवारलाई किरिया खर्च जुटाउनै कठिन भइरहेको छ ।

मगरको गत शुक्रबार बेलुका ७२ वर्षको उमेरमा मृत्यु भएको हो ।

छिमेकी र आफन्तसँग सरसापटी गरेर चार दिनसम्म किरिया बसे पनि अबको खर्चका लागि कर्जा खोज्नुबाहेकको विकल्प नरहेको ६२ वर्षीया उनकी श्रीमती दीपाले बताइन् । ‘अहिलेसम्म सरसापट गरेको १४ हजार रुपैयाँ सकिसक्यो,’ उनले भनिन्, ‘१३ दिनसम्म हुने किरिया खर्चको जोहोमा लागेकी छु । ३/४ ठाउँमा कर्जाका लागि कुरा गर्दा पनि अहिलेसम्म जुटेको छैन् ।’

उनको परिवार तीन पुस्तादेखि त्यहाँ ऐलानी जग्गामा बनाएको टिनको टहरामा बसोबास गरिरहेको छ । श्रीमान्–श्रीमती मिलेर ज्याला मजदुरी गरेर तीन जना छोरीलाई हुर्काउँदा एक रुपैयाँ पनि जोगाउन नसकेको दीपाले सुनाइन् । ‘श्रीमानकाे मृत्युपछि अहिले छाक टार्न मुस्किल भइरहेको छ नै, अझ मृत्यु भइसकेका श्रीमान्को किरिया खर्च नजुट्दाको पीर थपिएको छ,’ उनले भनिन्, ‘गरिबीले बडो कष्ट दिइरहेको छ ।’