पर्सा — वीरगन्जमा सामुदायिक कुकुरहरूको बन्ध्याकरण अभियान सुरु भएको छ । शनिबार १४ सामुदायिक कुकुरको बन्ध्याकरण गरिएको हो ।

वीरगन्जमा सक्रिय पशुपन्छी अधिकार जागरण समूह सुमार्ग बिन्दुआमा फाउन्डेसन तथा नेपाल भेटरीनरी एसोसिएसन मधेश प्रदेशको संयुक्त आयोजनामा अभियान सुरु गरिएको हो । फाउन्डेसनकी अध्यक्ष प्रतिभा कोइरालाले सामुदायिक कुकुरको संख्या महानगरमा बर्सेनि बढ्दै गएको सन्दर्भमा कुकुरको बन्ध्याकरण अपरिहार्य भएकाले यो अभियान चलाउनु परेको बताइन् ।

महानगरका ३२ वटै वडामा गरी १० हजार बढी सामुदायिक कुकुर रहेको तर तिनको मानवसँगको द्वन्द्व बढ्दै गएर कुकुर र मानव दुवैलाई जोखिम बढ्दै गएको उनले बताइन् । ‘स्थानीयले कुकुरलाई कुट्ने, तातोपानी फाल्ने, कुकुरहरू विभिन्न रोगको सिकार हुने र सवारी दुर्घटनामा घाइते हुने तथा मर्ने जस्ता घटना निरन्तर भइरहेका छन्,’ उनले भनिन्, ‘सामुदायिक कुकुरको संख्या नियन्त्रण भए यस्तो द्वन्द्व घट्ने र कुकुरमाथिको ज्यादतिका घटनामा पनि कमी आउँदै जानेछ ।’