सिरहा — सिरहाको कल्याणपुर नगरपालिकाका निलम्बित मेयर रामपुकार साहको घूस मुद्दामा अदालतले लगाउ राख्ने आदेश दिएको छ । विशेष अदालतले आइतबार मुद्दामाथि सुनुवाइ गर्दै लगाउ राख्ने आदेश दिएको हो ।

अदालतका न्यायाधीश नारायणप्रसाद पौडेल र हेमन्त रावलको दुई नम्बर इजलासले यस्तो आदेश दिएको सूचना अधिकारी यज्ञराज रेग्मीले जानकारी दिए । यो भनेको साहको मुद्दासँग सम्बन्धित अन्य विषय पनि आएकोले त्यसलाई पनि सँगै लाने भन्ने हो ।

कल्याणपुर नगरपालिका-६ स्थित भोक्राहामा २० लाख बजेटमा निर्माण भएको नालाका उपभोक्ता समितिसँग एक लाख रुपैयाँ घूस लिइसकेको अवस्थामा गत असार ३२ मा मेयर साहलाई अख्तियारको टोलीले नगरपालिकाको कार्यालयबाटै पक्राउ गरेको थियो ।

अख्तियारमा उपभोक्ता समिति अध्यक्ष जसोधा कुमारी र उपभोक्ता समितिले निर्णय नै गरी काम गर्ने जिम्मेवारी दिएका स्थानीय कुशेश्वर साहले संयुक्त रूपमा उजुरी दिएका थिए । तर, कुशेश्वर अडिग रहे पनि जसोधाले भने विशेष अदालतमा कात्तिक ५ मा बकपत्रका क्रममा आफूलाई केही थाहा नभएको भन्दै बयान फेरेकी थिइन् ।

अख्तियारले बयान फेरेको भन्दै मंसिर २६ मा जसोधामाथि पनि एक लाख रुपैयाँ बिगो कायम गरी भ्रष्टाचार निवारण ऐन, २०५९ को दफा ३ को उपदफा (३) ले निर्देश गरेबमोजिम सोही ऐनको दफा ३ को उपदफा (१) को देहाय (ख) बमोजिम कैद र जरिवाना सजाय गर्नुपर्ने मागसहित अदालतमा मुद्दा दायर गरेको छ ।