मुख्यमन्त्रीमा कांग्रेस र लोसपाको दाबी कायम रहे पनि सात दलले आफूहरू सहमतिनजिक पुगेको नेताहरूले बताएका छन्।
जनकपुर — मधेस प्रदेशमा नयाँ सरकार गठनका लागि सात दलीय गठबन्धन सहमतिनजिक पुगेको छ । मुख्यमन्त्रीमा कांग्रेस र लोसपाको दाबी कायम रहँदा पनि सात दलले आफूहरू सहमतिनजिक पुगेको नेताहरूले बताएका छन्।
जसपा नेपालका प्रमुख सचेतक रामआशिष यादवले मुख्यमन्त्रीमा कांग्रेसका कृष्णप्रसाद यादव र लोसपाका जितेन्द्र सोनलको दाबी कायम रहेको बताए । ‘उहाँ दुवै जनाको दाबी अझै छँदैछ । तर, दुवै जनाले सात दलको गठबन्धनले गर्ने निर्णय मान्य हुने भनेका छन्,’ यादवले भने, ‘लगभग हामी सहमतिनजिक नै छौँ । आज फेरि बैठक बसेर टुङ्ग्याउँछौँ ।’
सात दलीय गठबन्धनले कांग्रेसको नेतृत्वमा नयाँ सरकार बनाउने सहमतिमा पुगेको बैठकमा सहभागी एक सांसदले बताए । ‘कांग्रेसलाई सरकारको नेतृत्व दिएर अगाडि बढ्ने लगभग सहमति भइसकेको छ,’ ती सांसदले भने, ‘बाहिर ल्याउँदा एमालेलगायतले खेल्न सक्ने भनेर गोप्य राखिएको छ ।’
बिहीबार अबेर रातिसम्म सात दलको बसेको बैठकपछि उत्साहित भएर बाहिर निस्केका नेता–सांसदले ‘सबै विषय टुंगिएको र शुक्रवार दिउँसो ३ बजे प्रदेश प्रमुखकहाँ सरकार बनाउन दाबी पेस गर्ने’ प्रतिक्रिया दिएका थिए ।
सर्वोच्च अदालतले २४ घण्टाभित्र विश्वासको मत लिनु नभए संविधानको धारा १६८ को २ बमोजिम नयाँ सरकार गठनका लागि आह्वान गर्नु भनेर जारी गरेको परमादेशअनुसार मधेस प्रदेशका प्रदेश प्रमुख सुरेन्द्र लाभ कर्णले जारी गरेको पत्रमा शुक्रवार साँझ ५ बजेसम्म सरकारका लागि दाबी पेस गर्न समय दिइएको छ।
