डिप बोरिङ परीक्षण गर्दा मोटर नै जलिसकेको छ भने त्यहाँको योजना सफल नहुने देखेर फिल्टर पनि झिकिसकेको छ ।
What you should know
राजविराज — ट्यांकीमा पानी आपूर्तिका लागि नेपाल खानेपानी संस्थान शाखा कार्यालय राजविराजले एक करोडभन्दा बढी रुपैयाँ खर्चेर सप्तरीको राजविराज नगरपालिका–९ मलेठमा औद्योगिक क्षेत्र पम्प स्टेसन निर्माण गर्यो । तर, ६ वर्षमा एक लिटर पनि खानेपानी आपूर्ति हुन सकेको छैन ।
संस्थानले २०७७/०७८ मा त्यहाँ ३६ लाख ३३ हजार ४ सय ७६ रुपैयाँमा डिप बोरिङ र ०७८/०७९ मा ५९ लाख २ हजार ८ सय ७१ रुपैयाँमा पम्प अपरेटर क्वाटर, ट्वाइलेट, सेप्टिक ट्याङ्क तथा कम्पाउन्ड वाल निर्माण गरेको थियो । संस्थानले ट्रान्सफर्मर जडानसहित विद्युतीकरणमा पनि ६ लाख रुपैयाँ खर्च गरेको छ । तर, कुल एक करोड एक लाख ३६ हजार ३ सय ४७ रुपैयाँ खर्चेर निर्माण गरिएको पम्प स्टेसन अझै सञ्चालन हुन सकेको छैन ।
डिप बोरिङ परीक्षण गर्दा मोटर नै जलिसकेको छ भने त्यहाँको योजना सफल नहुने देखेर फिल्टर पनि झिकिसकेको छ । पम्प स्टेसन रेखदेख गर्न ०७८ पुस १४ मै ज्यालामा नियुक्त गरिएका एकजना कर्मचारी भने घाम तापेरै तलब खाइरहेका छन् ।
तीन हजार चार सय ८ जना उपभोक्ता रहेको संस्थानमा अहिले संस्थानकै परिसर, पडरिया, खर्साल र नेपाल टेलिकम परिसरमा रहेका डिप बोरिङबाट दैनिक ४० लाख लिटर पानी आपूर्ति हुँदै आएको छ । तर, आपूर्ति भएका पानीबाट पनि २५ प्रतिशत फिल्टर गर्दा नै आइरनयुक्त खेर जाँदा ३२ लाख लिटर मात्रै खानेपानीका लागि वितरणयोग्य रहन्छ । अहिले बिहान, दिउँसो र बेलुका गरी दैनिक साढे ५ घण्टा धारामा छोड्दै आए पनि उपभोक्ताका लागि पर्याप्त होइन । उपभोक्ताले धारामा पानी छोड्ने समय बढाउनका लागि माग गरिरहँदा पनि निर्माण भइसकेको पम्प स्टेसन सञ्चालन गर्न सकेको छैन ।
संस्थान राजविराजका प्रमुख दीपेन्द्र देवले निर्माणाधीन मलेठ–राजविराज सडक खण्ड के–कति लेनमा विस्तार हुने विषय यकिन नभएका कारण पाइप ओछ्याउन नसकिएको बताए । ‘पाइप ओछ्याउन नसक्दा नै पम्प स्टेसन सञ्चालन गर्न नसकेर ट्यांकीसम्म पानी आपूर्ति गर्न सकिएको छैन,’ उनले भने, ‘हामी यस वर्ष पाइप ओछ्याएर सञ्चालन गर्ने प्रयासमा छौं ।’
