बिहीबार बिहान उनको शव हात्तीले किचेर मृत्यु भएको अवस्थामा फेला परेको थियो ।
राजविराज — सप्तरीको कञ्चनरुप नगरपालिका–५ पिप्रा पूर्वमा काटेको धान रुँग्न राति खेतमा पहरा बसिरहेका एक वृद्धको हात्तीको आक्रमणबाट मृत्यु भएको छ ।
बुधबार धान काट्दाकाट्दै रात परेपछि ६५ वर्षका नारायण खंग खेतमा बनाएको झुप्रोमा बसिरहेका बेला जंगली हात्तीको आक्रमणमा परेका हुन् । बिहीबार बिहान उनको शव हात्तीले किचेर मृत्यु भएको अवस्थामा फेला परेको इलाका प्रहरी कार्यालय कञ्चनपुरका प्रमुख डीएसपी माधवप्रसाद काफ्लेले बताए ।
घरदेखि दुई किलोमिटरको दुरीमा रहेको खेतको झुप्रोमा उनी बसिरहेको बेला हात्तीले आक्रमण गरेको थियो । झुप्रो तोडफोड गर्न थालेपछि उनी भाग्ने प्रयाससमेत गरेका थिए । झुप्रोदेखि केही दुरीमा उनको शव फेला परेको हो । हात्तीले झुप्रो भत्काउँदै लखेटेर उनीमाथि आक्रमण गरेको मृतककी पत्नी जानकीदेवीले बताइन् । ‘बिहान ट्याक्टरैबाट धान घर लग्ने भन्दै उहाँ खेतमै पहरा बसेर हामीलाई घर पठाइदिनुभयो,’ उनले भनिन्, ‘राति हात्ती आउन सक्छ भनेर कसैले सोचेका थिएनौं ।'
