विश्वासको मत लिने कार्यसूची रहेको बैठकमा सरकारका तर्फबाट कोही पनि उपस्थित नभएपछि उपसभामुख बबिता राउत ईसरले मुख्यमन्त्री यादवलाई विश्वासको मत प्राप्त गर्न प्रस्ताव पेस गर्न अनुमति दिएर बैठक स्थगित गरेकी छन्।
जनकपुर — मुख्यमन्त्री सरोजकुमार यादवको अनुपस्थितिमै प्रदेशसभाको बैठक अगाडि बढाइएको छ । विश्वासको मत लिने कार्यसूची रहेको बैठकमा सरकारका तर्फबाट कोही पनि उपस्थित नभएपछि उपसभामुख बबिता राउत ईसरले मुख्यमन्त्री यादवलाई विश्वासको मत प्राप्त गर्न प्रस्ताव पेस गर्न अनुमति दिएर बैठक स्थगित गरेकी छन्।
तर, मुख्यमन्त्री र सरकारको उपस्थिति नरहेकाले उपसभामुख राउतले बैठक आजै २ बजेसम्मका लागि स्थगित गरेकी छन् ।
यसअघि, विश्वासको मत लिन प्रदेशसभा सचिवालयले तोकेको समयमा मुख्यमन्त्री यादव प्रदेशसभामा उपस्थिति भएन । उनी नपुग्दा समयमा बैठक बस्न सकेन । लोसपाका सांसद उपेन्द्र महतोका अनुसार विश्वासको मत प्रस्तुत गर्ने मुख्यमन्त्री यादव नै प्रदेशसभामा समयमा नआउँदा बैठकमा ढिलाइ भएको थियो ।
मुख्यमन्त्री यादवले सर्वोच्च अदालतले दिएको परमादेशमा २४ घण्टाभित्र विश्वासको मत लिन भनिए पनि आफूले मंगलबार दिउँसो ३ बजे मात्र पत्र प्राप्त गरेकाले विश्वासको मतका लागि प्रदेशसभाको बैठक बुधवार दिउँसो २ बजे बोलाउन प्रदेशसभा सचिवालयलाई पत्र लेखेको थियो । तर, प्रदेशसभा सचिवालयले बुधवार विहान साढे ८ बजे नै विश्वासको मतका लागि प्रदेशसभा बैठकको समय तोकेको थियो ।
