जनकपुर — मधेश प्रदेशसभाका प्रतिपक्षी दलका सांसदहरूले सभामुख रामचन्द्र मण्डलले बिजुली काटेको आरोप लगाएका छन् । बुधबार दिउँसो १ बजेका लागि बैठक बोलाइए पनि अहिलेसम्म सुरु हुन सकेको छैन । 

यतिबेला प्रदेशसभा भवन परिसरमा डीजेवाला गाडीबाट बत्ती जोड्न खोजिएको छ । प्रदेशसभा बैठक अवरुद्ध होस् भनेर सभामुख मण्डलले जानीजानी बिजुली काटेको प्रतिपक्षी सांसदको आरोप छ ।

यसअघि पनि सभामुखमाथि प्रस्ताव लिएर आउँदा लाइन काटिएको थियो । सभामुख आजको बैठकम नहोस् भन्ने पक्षमा छन् भने सात दल प्रस्तावमाथि छलफल गर्नु पर्ने अन्तिम दिन भएको हुनाले बस्ने तयारीमा छन् ।

साथै प्रदेशसभा सचिव नहुँदा बैठक सञ्चालनमै अन्योल देखिएको छ । आज सभामुख रामचन्द्र मण्डलविरुद्ध दर्ता भएको पद अनुकूल आचरण नगरेको प्रस्तावमाथि छलफल हुने बताइएको छ । कांग्रेससहित ७ दलका ६४ जना प्रदेशसभा सदस्यले सभामुख मण्डलले पद अनुकूल आचरण नगरेको प्रस्ताव दर्ता गराएका थिए ।