जनकपुरधाम — मधेश प्रदेशसभा बैठक बुधबार बस्ने भएको छ । उपसभामुख बबिता राउत इसरको निर्देशनपछि प्रदेशसभा सचिवालयले बुधबार दिउँसो १ बजे बैठक बस्ने सूचना प्रकाशन गरेको हो । उक्त बैठकमा सभामुख रामचन्द्र मण्डलले पदीय मर्यादाअनुकूल आचरण नगरेको प्रस्तावमाथि छलफल हुने समेत प्रदेशसभा सचिवालयले जनाएको छ । 

लामो समयदेखि अवरुद्ध रहेको मधेस प्रदेशसभा सञ्चालनका लागि मंगलबार विभिन्न पार्टीका मधेस प्रदेशसभाका ३२ जना प्रदेशसभा सदस्यहरूले उपसभामुख इसरसमक्ष माग गरेका थिए । 

विपक्षी दलहरूका तर्फबाट प्रदेशसभा सदस्य भरतप्रसाद साहले प्रदेशसभा सदस्यहरूको हस्ताक्षरसहित उपसभामुख राउतलाई मंसिर ३ गते बुधबार प्रदेशसभा बैठक बोलाउनका लागि मागपत्र बुझाएका थिए । 

प्रदेशसभा नियमावलीअनुसार प्रदेशसभा २५ प्रतिशत सदस्यले बैठक बोलाउन माग गरेको खण्डमा बैठक बोलाउनुपर्ने कानुनी प्रावधान छ । 

मधेस प्रदेशसभामा सभामुख मण्डल विरुद्धमा दर्ता भएको महाभियोगको प्रस्तावमाथि छलफल प्रक्रिया अगाडि बढाउनका लागि सात दलबाट माग भएको हो ।

गएको कात्तिक २७ गते साँझ सभामुख मण्डलले प्रदेशसभा सदस्यलाई दुर्व्यवहार गरेका थिए । त्यसपछि प्रदेशसभाका कर्मचारी अनुपस्थित हुन थालेका छन् । जसले गर्दा मधेश प्रदेशसभाको सबै कामकाज ठप्प छ ।