कमला र सहजाको पुल नबन्दा स्थानीयले वर्षौंदेखि चरम सास्ती भोग्दै आएका छन्
सिरहा — मधेशको लाइफलाइन मानिने हुलाकी सडकअन्तर्गत कमला र सहजा नदीमा पुल नबनाएको भन्दै सिरहामा स्थानीयले सरकारविरुद्ध 'अर्थी जुलुस' निकालेका छन् । हुलाकी सडक संघर्ष समितिले आइतबार सिरहा सदरमुकाममा अर्थी जूलुस निकालेको हो ।
कमला र सहजाको पुल नबन्दा स्थानीयले वर्षौंदेखि चरम सास्ती भोग्दै आएको भए पनि सरकार यसप्रति संवेदनशील र जिम्मेवार नदेखिएको उनीहरूको आरोप छ । 'हामीलाई सरकार बाँचेकै छ जस्तो लाग्न छाड्यो, त्यसैले सरकारको अर्थी जुलुस निकालेका हौं,' संघर्ष समितिका संयोजक रामरिझन यादवले भने ।
जुलुसका क्रममा प्रदर्शनकारी र आन्दोलनकारीबीच नोकझोकसमेत परेको थियो । आफूहरूको आवाजलाई सरकारले बेवास्ता गरिरहे चरणबद्ध निर्णायक संघर्षमा जान बाध्य हुने चेतावनी यादवले दिए ।
