पर्सा — खडेरी र बाली भित्र्याउने बेला एक महिनामा २ पटकको बेमौसमी वर्षाले मधेश प्रदेशमा यस वर्ष धान उत्पादनमा करिब २० प्रतिशत कमी आउने अनुमान गरिएको छ ।

कृषि अनुसन्धान निर्देशनालय परावनीपुरमा आयोजना भएको प्रदेशस्तरीय कृषि प्राविधिक समूह कार्यशाला गोष्ठीमा कृषि विकास निर्देशनालय जनकपुरका प्रमुख जितेन्द्र यादवले यस्तो बताएका हुन् । यादवले धानबाली लगाउने बेला मधेशमा देखिएको खडेरीको कारण यसअघि नै धान खेती १३ प्रतिशतले घटेकामा धानबाली भित्र्याउने समयमा २ पटक भएको वर्षाले उत्पादनमै ठूलो असर परेको बताए ।

सामान्य अवस्थामा मधेश प्रदेशमा करिब १३ लाख मेट्रिक टन धान उत्पादन हुने गरेकामा यस वर्ष भने करिब १० लाख मेट्रिक टन मात्र उत्पादन हुने अनुमान गरिएको उनको भनाइ छ ।

मधेशका आठ जिल्लामा तीन लाख ७२ हजार ६ सय ४५ हेक्टर खेतीयोग्य जग्गामध्ये यस वर्ष ८७ प्रतिशत क्षेत्रफलमा मात्र धान रोपाइँ भएको छ ।

गोष्ठीमा भूमि व्यवस्था कृषि तथा सहकारी मन्त्रालयका सचिव उमेश दाहालले  मधेश प्रदेश सरकारले कृषि क्षेत्रमा यान्त्रिक प्रविधि गरेर उत्पादकत्व बढाउनेतर्फ अग्रसर रहेको बताए । प्रदेश सरकारका भएका प्रविधिहरुको उच्चतम  प्रयोग गर्दै कृषि क्षेत्रलाई व्यवस्थित गर्न लागि रहेको बताउँदै उनले प्राविधिकहरुको दक्षता अभिवृद्धि समग्र कृषि क्षेत्रलाई सुधार्नेतर्फ अग्रसर भइरहेको भनाइ राखे ।