धारा १६८ (२) अनुसार नयाँ सरकार गठनको आह्वान गर्न माग
What you should know
जनकपुरधाम — मधेश प्रदेश सरकारको ‘मधेश भवन’ अगाडि युवाहरूले धर्ना दिएका छन् । आइतबार साँझ मधेश भवनअगाडि युवाहरूले ‘प्ले कार्ड’सहित धर्ना दिएका हुन् । त्यसअघि उनीहरू प्रदेश प्रमुखको कार्यालय अगाडि धर्ना दिन पुगेका थिए ।
तर, सुरक्षाकर्मीको अनुरोधमा त्यहाँबाट सरेर मधेश भवनको मुख्य गेटअगाडि धर्ना दिएका छन् ।
मधेश प्रदेशमा संविधानको धारा १६८ को (२) बमोजिम नयाँ सरकार गठनको आह्वान गर्नुपर्ने उनीहरूको माग छ । युवाहरूले ‘संविधान मिच्न पाइँदैन, संविधानको धारा १६८ (२) अनुसार नयाँ सरकार गठनको आह्वान गर’ भन्ने प्ले कार्ड बोकेका थिए ।
शनिबार विश्वासको मत लिन मुख्यमन्त्री जितेन्द्र प्रसाद सोनार (सोनल) मधेश प्रदेशसभामा विश्वासको प्रस्ताव पेश गरेका थिए । तर, मत विभाजनमा जानुअघि नै उनले विश्वासको मत लिने वातावरण नभएको भन्दै राजीनामा घोषणा गरेका थिए । त्यसपछि सोनल समर्थित दलहरूले विश्वासको मत नगुमाएको भएकाले पुनः त्यही धारा अनुसार नयाँ सरकार गठनको आह्वान गर्नुपर्ने माग गर्दै आएका छन् ।
तर, नेकपा (एमाले) ले भने उक्त धारा असफल भइसकेको भएकाले नयाँ धारा अनुसार ठूलो दलले सरकारको नेतृत्व गर्न पाउनुपर्ने मनसाय बनाएको छ । नेपाली कांग्रेस भने सर्वपक्षीय सरकार बनाउने कसरत गरिरहेको छ ।
सोनल गएको असोज २९ गते ५६ सांसदको समर्थनमा मुख्यमन्त्री पदमा नियुक्त भएका थिए । तर, सत्तासाझेदार दलकै सांसदले मत नदिने र केही सांसद अनुपस्थित भएपछि सोनल मतदान प्रक्रियामा जानुअघि नै राजीनामा दिएका थिए । त्यसपछि नयाँ सरकार गठनका लागि प्रदेश प्रमुखले हालसम्म आह्वान गरिसकेका छैनन् । प्रदेश प्रमुख सुमित्रा भण्डारीले विभिन्न राजनीतिक दल र विज्ञहरूसँग भने परामर्श गरिरहेकी छिन् ।
